एजेन्सी – वेस्टइन्डिजका मध्यक्रमका ब्याट्सम्यान काईल मेयर्सले बंगलादेशविरुद्ध पहिलो टेष्ट खेलमा आइतबार डेब्यू खेलमा दोहोरो शतकीय इनिङ खेल्दै टोलीलाई ३ विकेटको अविश्वसनिय जित दिलाए ।

जितको लागि ३ सय ९५ रनको विशाल लक्ष्य पछ्याएको वेस्टइन्डिजले अन्तिम दिन उत्कृष्ट प्रर्दशनका साथ ७ विकेट गुमाउँदै पूरा गर्यो । पहिलो इनिङमा १ सय ७१ रनले पछि परेको वेस्टइन्डिजले सबैलाई आश्चर्य पार्दै अन्तिम दिनको खेल सकिन १५ बल बाँकी रहँदा जित दर्ता गर्यो । मेयर्सले एक रन बटुल्दै वेस्टइन्डिजलाई एक अविस्मरणीय जित दिलाए ।

टेष्ट क्रिकेट इतिहासमा डेब्यूमा दोहोरो शतक प्रहार गर्ने मेयर्स समग्रमा छैटौं खेलाडी हुन् । सन् २००३ पछि टेष्टमा डेब्यू गर्ने खेलाडीले दोहोरो शतक पहिलो पटक गरेका हुन् । डेब्युमै चौथो इनिङमा दोहोरो शतक प्रहार गर्ने मेयर्स पहिलो खेलाडी बनेका छन् । डेब्यू खेलमा वेस्टइन्डिजबाट दोहोरो शतक प्रहार गर्ने मेयर्स दोस्रो खेलाडी हुन् ।

समग्रमा टेष्ट क्रिकेटमा डेब्यू गर्दै दोहोरो शतक प्रहार गर्ने ६ खेलाडी यस प्रकार छन् ।

१. टिप फोस्टर (इंग्ल्यान्ड) १९०३

टेष्ट क्रिकेट इतिहासमा डेब्यूमै दोहोरो शतक प्रहार गर्ने पहिलो खेलाडी इंग्ल्यान्डका मध्यक्रमका ब्याट्सम्यान टिप फोस्टर थिए । उनले अष्ट्रेलियाविरुद्ध सड्नी मैदानमा १९०३ को डिसेम्बरमा दोहोरो शतकीय इनिङ खेल्दै यस दुर्लभ कीर्तिमान कायम गरेका थिए । टिपले पहिलो इनिङमा चौथो नम्बरमा ब्याटिङ गर्दै ४ सय १९ बल खेल्दै ३७ चौका सहित २ सय ८७ रनको इनिङ खेलेका थिए । जुन डेब्यू खेलमा बनेको सर्वाधिक रन हो । उनी उक्त खेलमा क्याच आउट हुँदै तेहेहो शतक बनाउनबाट चुकेका थिए । इंग्ल्यान्ड ५ विकेटले विजयी भएको थियो ।

२. लरेन्स रोवे (वेस्टइन्डिज) १९७२

वेस्टइन्डिजका लरेन्स रोवेले १९७२ फेब्रुअरी न्युजिल्यान्डविरुद्ध डेब्यू गर्दै २ सय १४ रनको दोहोरो शतकीय इनिङ खेलेका थिए । उक्त पहिलो इनिङमा ४ सय २७ बलमा १९ चौका र १ छक्का प्रहार गरेका थिए । उक्त समय उनले तेस्रो नम्बरमा ब्याटिङ गरेका थिए । उक्त खेल बराबरीमा सकिएको थियो ।

३. ब्रेन्डन कुरुप्पु (श्रीलंका) १९८७

श्रीलंका ओपनर तथा विकेटकिपर ब्रेन्डन कुरुप्पुले घरेलु मैदान कोलोम्बोमा सन् १९८७ मा न्युजिल्यान्डविरुद्ध अप्रिलमा डेब्यु खेलमा २ सय १ रनको अविजित इनिङ खेलेका थिए । ५ सय ४८ बलमा २४ चौका प्रहार गरेका थिए । ब्रेन्डन डेब्युमा दोहोरो शतक प्रहार गर्ने पहिलो ओपनर र विकेटकिपर ब्याट्सम्यान बन्न पुगेका थिए । उक्त खेलमा श्रीलंकाले पहिलो इनिङमा ३९७/९ को अवस्थामा इनिङ समाप्तिको घोषणा गरेको थियो । न्युजिल्यान्डले पहिलो इनिङमा ४०६/५ को अवस्थामा ब्याटिङ गर्दा खेल बराबरीमा सकिएको थियो ।

४. म्याथ्यु सिनक्लेयर (न्युजिल्यान्ड) १९९९

न्युजिल्यान्डका शीर्षक्रमका ब्याट्सम्यान म्याथ्यु सिनक्लेयरले १९९९ मा वेस्टइन्डिजविरुद्ध डिसेम्बरमा डेब्यू खेलमा तेस्रो नम्बरमा ब्याटिङ गर्दै ४ सय ४७ बलमा २२ चौका सहित २ सय १४ रनको इनिङ खेलेका थिए । उनको दोहोरो शतकको सहयोगमा न्युजिल्यान्डले ५१८/९ को अवस्थामा पहिलो इनिङ समाप्तिको घोषणा गरेको थियो । खेलमा न्युजिल्यान्ड १ सय ५ रनको इनिङ अन्तरले विजयी भएको थियो ।

५. ज्याक रुडोल्फ (दक्षिण अफ्रिका) २००३

दक्षिण अफ्रिका शीर्षक्रमका ब्याट्सम्यान ज्याक रुडोल्फले सन् २००३ मा बंगलादेशविरुद्ध पहिलो टेष्ट खेलमा डेब्यू गर्दै २ सय २२ रनको अविजित इनिङ खेलेका थिए । त्यसवेला दक्षिण अफ्रिकामा ग्रिम स्मिथ, मार्क बाउचर पउल एडम्स, हर्शल गिब्स जस्ता विश्व चर्चित ब्याट्सम्यन थिए । उनले ३ सय ८३ बलमा २९ चौका र २ छक्का सहित उक्त इनिङ खेलेका थिए ।

६. काइल मेयर्स (वेस्टइन्डिज) २०२१

वेस्टइन्डिजका तल्लोक्रमका ब्याट्सम्यान काइल मेयर्सले बंगलादेशविरुद्ध पहिलो टेष्टमा डेब्यू गर्दै यादगार इनिङ खेले । जितको लागि ३ सय ९५ रनको विशाल लक्ष्य पछ्याएको वेस्टइन्डिज ५९–३ को अवस्थामा पुगेको थियो । तर काइल मेयर्स ३ सय १० बलमा २० चौका र ७ छक्का सहित २ सय १० रनमा दोहोरो शतकीय इनिङ खेले । जुन डेब्यु खेलमा चौथो इनिङमा दोहोरो शतकीय इनिङ खेल्ने पहिलो खेलाडी मात्र बनेनन् वेस्टइन्डिजलाई एक अविश्मरणीय जित दिलाए ।

यो पनि : को हुन् काइल मेयर्स ?