काठमाडौं (हाम्रो खेलकुद) – कर्णाली प्रदेशका तीव्र गतिका बलर अनुज चनारालाई सौराह स्यान्ड्सले जुत्ता किन्नको लागि १५ हजार रुपैयाँ आर्थिक सहयोग गरेको छ ।

यसै साता नेपाल क्रिकेट संघ (क्यान) ले ओमान भ्रमणको लागि बन्द प्रशिक्षणमा ३२ सदस्य टोलीलाई बोलाएको थियो । अनुज नेपाली क्रिकेट टोलीको बन्द प्रशिक्षणमा पहिलो पटक परेका थिए । पहिलो पटक परेपछि आइतबार हाम्रो खेलकुद डटकमले उनको क्रिकेट यात्रालाई समेट्दै ‘साथीको जुत्ता र भान्जाको साथमा राष्ट्रिय टोलीको यात्रा’ शीर्षकमा समचार लेखेको थियो ।

जाजरकोटका १६ वर्षिय अनुजले आर्थिक अवस्था कमजोर हुँदा प्रधानमन्त्री कप क्रिकेटमा साथीको जुत्ता मागेर खेलेको कुरा समेट्दै समचार आएको थियो । उक्त समचार पढेपछि सौराह स्यान्ड्सले १५ हजार रुपैयाँ दिने जनाएको थियो ।

सोमबार सौराहका मुख्य प्रशिक्षक तथा बागमती प्रदेशका कोषाध्यक्ष अनिल अधिकारी र टोलीका बोर्ड सदस्य गणेश तिमिल्सिनाले टियु क्रिकेट मैदानमा बन्द प्रशिक्षमा अभ्यास गरि रहेका अनुजलाई भेटेर १५ हजार रुपैयाँ हस्तान्तरण गरेका थिए । सौराह चितवन प्रिमियर लिग (सिपिएल) को एक फ्रेन्चाइज टोली हो । गत वर्ष चितवनको क्याम्पाचौरमा भएको फाइनलमा सौराह राप्ती र्यापिड्ससँग पराजित हुन पुगेको थियो । उक्त प्रतियोगितामा अनुज सौराहबाट खेल्दै राम्रो प्रर्दशन गरेका थिए ।

‘आइतबार अनुजको बारेमा हाम्रो खेलकुदमा समाचार आयो । त्यहाँ उनले जुत्ता किन्न नसकेको र साथीको मागेर खेलेको भन्ने थियो । म गतवर्ष सिपिएलमा सौराहको प्रमुख प्रशिक्षक पनि थिए । हाम्रो खेलाडी हुँदा अनुजलाई जुत्ता किन्न १५ हजार रुपैयाँ दिने प्रस्ताव राखें र टोलीका अन्य सदस्यहरुले पनि मान्नुभयो । त्यसैको लागि आज भेटेर दिएका हौं’, अनिल अधिकारीले हाम्रो खेलकुदसँग भने ।

‘आगामी दिनमा पनि हामीले अष्ट्रेलियाबाट आर्थिक सहयोग जुटाउँदै अनुजलाई सहयोग गर्ने सोचमा छौं । केहि दिनमा हुन्छ होला । जुत्ता किन्ने पैसा पाएपछि अनुज साह्रै खुसी थिए’, अधिकारीले भने ।

अनुजले पनि सौराहलाई धन्यवाद दिएका छन् । अनुज गत साता काठमाडौंमा सम्पन्न प्रधानमन्त्री कप एकदिवसिय क्रिकेट प्रतियोगितामा कर्णालीबाट खेल्दै उत्कृष्ट प्रर्दशन गरेपछि पहिलो पटक राष्ट्रिय टोलीको बन्द प्रशिक्षणमा परेका हुन् ।