काठमाडौं (हाम्रो खेलकुद) – कर्णाली प्रदेशका तीव्र गतिका बलर अनुज चनाराले नयाँ जुत्ता पाएका छन् । यसै साता नेपाल क्रिकेट संघ (क्यान) ले ओमान भ्रमणको लागि बन्द प्रशिक्षणमा ३२ सदस्य टोलीलाई बोलाएको थियो ।

अनुज नेपाली क्रिकेट टोलीको बन्द प्रशिक्षणमा पहिलो पटक परेका थिए । आइतबार हाम्रो खेलकुद डटकमले उनको क्रिकेट यात्रालाई समेट्दै ‘साथीको जुत्ता र भान्जाको साथमा राष्ट्रिय टोलीको यात्रा’ शीर्षकमा समचार लेखेको थियो ।

जाजरकोटका १६ वर्षिय अनुजले आर्थिक अवस्था कमजोर हुँदा प्रधानमन्त्री कपमा साथीको जुत्ता मागेर खेलेको कुरा समेट्दै समचार आएको थियो । बन्द प्रशिक्षणमा आउँदा उनको साथीको खेल परेपछि उक्त जुत्ता साथीले नै लगाएको र उनी एक वर्षअघि किनेको सामान्य जुत्ता लगाएर आएका थिए ।

उक्त सामचार पढेपछि उनलाई नेपाली क्रिकेटका सक्रिय समर्थक (फ्यान) मिलेर मंगलबार १८ हजार नेपाली रुपैयाँ बराबरको जुत्ता हस्तान्तरण गरेका छन् । नेपाली क्रिकेटका युवा अभियन्ता तथा सक्रिय समर्थक तारा पाठक, विनोद जि.सी, गोविन्द भुषाल, प्रतीक उपाध्याय, जय लामिछाने र कृष्ण खनाल मिलेर अनुजलाई रु १८ हजार बराबरको जुत्ता मंगलबार टियु क्रिकेट मैदानमा हस्तान्तरण गरेका थिए । नयाँ जुत्ता पाएसँगै उनले उत्साहित र खुसी हुँदै सबैलाई धन्यावाद दिएका छन् ।

उनीहरुले नेपाल क्रिकेट संघ (क्यान) का मिडिया संयोजक भानु सिग्देल मार्फत अनुजलाई जुत्ता हस्तान्तरण गरेका थिए । सोमबार अनुजलाई जुत्ता किन्न सौराह स्यान्ड्सले १५ हजार रुपैयाँ हस्तान्तरण गरेको थियो ।

त्यस्तै अनुजलाई बागलुङ नगरपालिका वडा नम्बर ८ का वासिन्दा तथा अधिबक्ता रमेश बहादुर खड्काले ७ हजार र कमल सुनचाँदी पसल पोखरा, बेनी र म्याग्दीका प्रमुख कमल विश्वकर्माले पनि ५ हजार सहयोग गरेका छन् ।