काठमाडौं (हाम्रो खेलकुद) – नेपालको राइजिङ क्रिकेट फर वुमन (आरसिडब्लू) भारतको नोयडामा जारी राइजिङ स्टारलेट्स गर्ल्स क्रिकेट प्रतियोगिताको सेमिफाइनलमा पुगेको छ ।

बिहीबार आरसिडब्लूले मेरठलाई १५ रनले हराउँदै आरसिडब्लू समूह ‘बी’ को उप विजेताको रुपमा सेमिफाइनलमा पुगेको हो । पहिला ब्याटिङ गरेको आरसिडब्लू १९ ओभरमा ५९ रनमा अल आउट भएको थियो । आरसिडब्लूकी सम्झना खड्का २० रनमा अविजित रहँदा रुवि पोद्दर १५ र एनिसा मजाकोटी १० रनमा आउट भए । मेरठकी भुमि चौहान, ज्योती बलियान र खुसी शर्माले ३-३ विकेट लिए ।

६० रनको विजयी लक्ष्य पछ्याएको मेरठ ४४ रनमा अल आउट भएको थियो । आरसिडब्लूकी लक्ष्मी साउद ७.४ ओभरमा १ मेडन सहित १९ रन खर्चेर ६ विकेट लिइन् । कृतिका मरासिनीले ३ र कृष्मा गुरुङले एक विकेट लिए ।

समू बी मा मेरथ, दिल्ली र आरसिडब्लू थिए । समूह बी बाट मेरठ विजेता र आरसिडब्लू उपविजेताको रुपमा सेमिफाइनलमा पुगेका छन् । आरसिडब्लूले फाइनल प्रवेशका लागि शुक्रबार एनसिआर वुमन्स क्लबसँग खेल्ने छ । फाइनल आइतबार हुनेछ ।

आरसिडब्लू राजस्थानसँग पराजित भएको थियो भने दिल्लीलाई हराएको थियो । भारतीय टोलीमा स्टेट लेभल खेलेका खेलाडी पनि छन् । आरसिडब्लूको कप्तानी नेपाली राष्ट्रिय क्रिकेट टोलीको सदस्य रहिसकेकी सदस्य आरति बिडारीले गरेकी छिन् ।