काठमाडौं (हाम्रो खेलकुद) – युवा अलराउन्डर योगेन्द्र सिंह कार्कीको उत्कृष्ट ब्याटिङसँगै मुनस्टोन क्रिकेट क्लव १७ औं संस्करणको ‘प्रेम मार्केट चितवन च्याम्पियनसिप ट्रफी–२०७७ मा लगातार दोस्रो जित निकाल्दै फाइनलमा प्रवेश गरेको छ ।

धुर्मुस–सुन्तली फाउण्डेशनको सहयोगमा जनस्तरबाट चितवनको रामपुरमा निर्माण भइरहेको गौतमबुद्ध अन्तर्राष्ट्रिय क्रिकेट रंगशालाको नमुना खेल मैदानमा विहीबार भएको खेलमा चितवन क्रिकेट क्लवलाई ७८ रनले पराजित गर्दै मुनस्टोन एक खेल अगावै फाइनलमा प्रवेश गरेको हो ।

टस हारेर पहिला ब्याटिङको निम्तो पाएको मुनस्टोनले निर्धारित ४९ ओभरमा ७ विकेटको क्षतिमा २ सय ६३ रन बनाएको थियो । मुनस्टोनका युवा अलराउन्डर योगेन्द्र सिंह कार्कीले ६० बलमा ९३ रनको योगदान दिए । मनिस अधिकारीले ४८ बलमा ३९ र हरिबहादुर चौहानले ४४ बलमा ३३ रन बनाए । चितवन क्रिकेट क्लवका लागि राशिद खानले १० ओभरमा एक मेडनसहित ४४ रन खर्चेर ३ विकेट लिए ।

जितको लागि २ सय ६४ रनको विजयी लक्ष्य पछ्याएको चितवन क्रिकेट क्लव ४४.२ ओभरमा १ सय ८५ रनमा अल आउट भयो । केशवजंगले ४२ बलमा ४४, राशिद खानले ४९ बलमा ३५ रनको योगदान दिए । अन्य ब्याट्म्यानले राम्रो प्रर्दशन गर्न सकेनन् ।

मुनस्टोनका कमल थापाले १० ओभरमा ४१ रन खर्चिदै ३ र विज्ञान गौतमले १० ओभरमा २ मेडनसहित २३ रन खर्चिदै २ विकेट लिए । योगेन्द्र सिंह कार्की म्यान अफ द म्याच चुनिए । समूह ‘ए’ मा रहेको मुनस्टोनले लिगको पहिलो खेलमा बेलचोक क्रिकेट क्लवलाई ९ विकेटले पराजित गरेको थियो । उपाधिका लागि मुनस्टोनले समूह ‘बी’ को विजेतासंग प्रतिस्पर्धा गर्नेछ ।

चितवन क्रिकेट संघको आयोजनामा जारी १७ औं संस्करणको ‘प्रेम मार्केट चितवन च्याम्पियनसिप ट्रफी–२०७७’ फागुन ३ गतेसम्म चल्ने छ । प्रतियोगिताको विजेताले २० हजार रुपैयाँ र उपविजेताले १० हजार रुपैयाँ पुरस्कार पाउने छ । यस्तै म्यान अफ दि म्याच, म्यान अफ दि सिरिज, बेस्ट बलर र बेस्ट ब्याट्सम्यान पुरस्कार पाउने छन् ।