काठमाडौं (हाम्रो खेलकुद) – युवा विकेटकिपर ब्याट्सम्यान अनिल शाहको शानदार शतकको सहयोगमा चितवनको भरतपुरमा जारी १७ औं संस्करणको ‘प्रेम मार्केट चितवन च्याम्पियनसिप ट्रफी–२०७७ मा चितवन क्रिकेट क्लवले सान्त्वना जित हात पारेको छ ।

चितवन क्रिकेट क्लवले अनिलको शतकमा शुक्रबार बेलचोक क्रिकेट कलवलाई २ सय ४० रनको फराकिलो अन्तरले पराजित गरेको थियो ।धुर्मुस–सुन्तली फाउण्डेशनको सहयोगमा जनस्तरबाट रामपुरमा निर्माण भइरहेको गौतमबुद्ध अन्तर्राष्ट्रिय क्रिकेट रंगशालाको नमुना खेल मैदानमा चितवन क्रिकेट क्लवले दिएको ३ सय ५२ रनको विशाल लक्ष्य पछ्याएको बेलचोक २७.२ ओभरमा १ सय ११ रनमा अलआउट भयो ।

बेलचोकका लागि राजकुमार शाहले २० र अविनाशले १८ रन बनाए । अन्यले राम्रो प्रर्दशन गर्न सकेनन् । चितवन क्रिकेट क्लवका लागि आशिष लम्सालले १० ओभरमा ४७ रन खर्चिदै ४ विकेट लिए । राशिद खान र सुजन भट्टले २–२ विकेट लिए ।

त्यसअघि टस जितेर पहिले व्याटिङ गरेको चितवन क्रिकेट क्लवले निर्धारित ५० ओभरमा ८ विकेट गुमाउँदै ३ सय ५१ रन बनाएको थियो । जारी प्रतियोगितामा यो सर्वाधिक रन हो । विकेटकिपर अनिल शाहले १ सय ३ बलमा १ सय ५४ रनको उत्कृष्ट शतकीय इनिङ खेले । खिम मल्लले ५३ र अशोक पौडेलले ४१ रनको योगदान दिए ।

बेलचोकका लागि गौतम केसीले ३ र जेनिस महतले २ विकेट लिए । अनिल शाह म्यान अफदि म्याच घोषित भए । प्रतियोगिताको विजेताले २० हजार रुपैयाँ र उपविजेताले १० हजार रुपैयाँ पुरस्कार पाउने छ ।