एजेन्सी – इन्डियन प्रिमियर लिग (आइपिएल) २०२१ अक्सन बिहिबार चेन्नईमा हुँदै छ । अक्सनमा कुल २ सय ९२ खेलाडी सहभागी हुनेछन् ।

टोलीमा कम आवश्यक, मूल्य बढी वा आफूसँग भएको भन्दा अझ उत्कृष्ट खेलाडी अनुबन्ध गर्न खेलाडीलाई फुकुवा गर्ने गरिन्छ । एक टोलीलाई कम आवश्यक खेलाडी अर्को टोलीलाई धेरै महत्वपूर्ण हुनसक्छ । आइपिएल अक्सन अघि सबै फ्रेन्चाइज टोलीले खेलाडी फुकुवा र अनुबन्ध (रिटेन) गरि सकेका छन् ।

फुकुवा हुनु अक्सनमा केहि खेलाडीलाई फाइदा हुन सक्छ । उत्कृष्ट क्षमता भएका तर न्यून मूल्य र कम खेल्न पाएका खेलाडी फुकुवा हुँदै अक्सनमा जाँदा मालामल बन्न सक्छन् । यसै सिजन फुकुवा भएका यी ६ खेलाडीलाई आइपिएल २०२१ मालामल हुन सक्छ ।

६. किमो पउल (वेस्टइन्डिज)

वेस्टइन्डिजका २२ वर्षिय अलराउन्डर किमो पउललाई दिल्ली क्यापिटल्सले फुकुवा गरेको थियो । सन् २०२० मा दिल्लीको पुरै बेन्चमा बसेका पउल तल्लोक्रममा ठूला सट र तीव्र गतिमा बलिङ गर्ने गर्दछन् । दिल्लीले २०१९ को अक्सनमा पउललाई न्यूनतम मूल्य ५० लाख रुपैयाँमा अनुबन्ध गरेको थियो ।

यस पटकको अक्सनमा पउलले आफ्नो न्यूनतम मूल्य ७५ लाख रुपैयाँ भारतीय तोकेका छन् । पललाई रोयल च्यालेन्जर्स बेंगलोर र किंग्स इलेभेन पञ्जावले अनुबन्ध गर्न सक्ने सम्भावना छ । जसले गर्दा उनको लागि फुकुवा हुनु फाइदा बन्न सक्छ ।

५. क्रिस ग्रिन (अष्ट्रेलिया)

अष्ट्रेलिया २७ वर्षिय अलराउन्डर क्रिस ग्रिनलाई गतवर्ष कोलकाताले २० लाख रुपैयाँमा अनुबन्ध गरेको थियो । उनले कोलकाताबाट एक खेलमात्र खेल्ने मौका पाएका थिए । ग्रिन स्पिन बलिङसँगै तल्लोक्रममा आक्रामक ब्याटिङ गर्न सक्ने क्षमता भएका अलराउन्डर हुन् । ग्रिनले यस पटक अक्सनमा आफ्नो न्यूनतम मूल्य ३० लाख भारतीय रुपैयाँ तोकेका छन् ।

यस पटक अक्सनमा पन्जाब, मुम्बई र राजस्थानलाई स्पिनरको आवश्यक देखिन्छ । जसले गर्दा अक्सनमा उनले यसभन्दा अघिको भन्दा बढी पारिश्रमिक पाउन सक्छन् । ग्रिनले पछिल्लो समय लगातार विश्वका अन्य फ्रेन्चाइज लिग खेल्दै राम्रो प्रर्दशन गर्दै आएका छन् ।

४.सन्दीप लामिछाने (नेपाल)

नेपाली लेगस्पिनर सन्दीप लामिछानेले अक्सनमा आफ्नो न्यूनतम मूल्य ४० लाख रुपैयाँ तोकेका छन् । तीन संस्करण दिल्ली क्यापिटल्सबाट सन्दीपले न्यूनतम मूल्य २० लाख रुपैयाँ पाएका थिए । सन्दीप २०२० मा पुरै सिजन दिल्लीको बेन्चमा बसेका थिए । तर २०२१ को लागि फुकुवा गरेसँगै अक्सनमा प्रतिस्पर्धा गर्दैछन् । उनीमाथी कुनै एक टोलीले मूल्य लगाएको खण्डमा यस अघिको सिजन भन्दा दोब्बर मूल्य पाउने छन् ।

सन्दीपले आइपिएल बाहेक अन्य विदेशी फ्रेन्चाइज लिग खेल्दै मध्यम प्रर्दशन गर्दै आएका छन् । टोली हेर्दा पन्जाब र मुम्बईमा स्पिनरको आवश्यक बढी देखिन्छ । चार विदेशी खेलाडीको कोटाको कारण सन्दीप दिल्लीको पुरै बेन्चमा बस्नु परेको थियो । गतवर्ष दिल्लीले चार विदेशी खेलाडीमा मार्कस स्टोइनिस, कागिसो रबाडा, शिम्रन हेटमायर र एनरिच नोर्कियालाई पहिलो रोजाईमा खेलाएको थियो ।

३. ओशान थोमस (वेस्टइन्डिज)

वेस्टइन्डिजका २३ वर्षिय तीव्र गतिका बलर ओशान थोमसलाई गत वर्ष राजस्थानले ५० लाख रुपैयाँमा अनुबन्ध गरेको थियो । तर कुनैपनि खेलमा थोमसलाई मौका दिएन । तीव्र गतिका बलर थोमस वेस्टइन्डिजको सिमित ओभरको क्रिकेट नियमित खेल्दै राम्रो प्रर्दशन गर्दै आएका छन् ।

यस पटक अक्सनमा सर्वाधिक महँगो मूल्यमा विक्न सक्ने खेलाडी तीव्र गतिका बलर देखिएका छन् । मुम्बई, पन्जाब र बेंगलोरबीच तीव्र गतिका बलर अनुबन्ध गर्न अक्सनमा पैसाको प्रतिस्पर्धा हुने छ । थोमस पनि अक्सन सूचिमा छन् । अक्सनमा थोमसले आफ्नो मूल्य ५० लाख नै तोकेका छन् ।

२. जेसन रोय (इंग्ल्यान्ड)

इंग्ल्यान्डका ओपनर जेसन रोयलाई गतवर्ष दिल्ली क्यापिटलसले टोलीमा अनुबन्ध गरेको थियो । तर रोयले भने ब्यक्तिगत कारण उक्त सिजनको आइपिएल खेलेनन् । दिल्लीले रोयलाई न्यूनतम मूल्य १ करोड ५० लाख रुपैयाँमा अनुबन्ध गरेको थियो । रोय वर्तमान समयका एक उत्कृष्ट ओपनर हुन् । रोयले ठूलो इनिङका साथ एक्लै खेललाई सहज जित दिलाउन सक्ने क्षमता राख्छन् ।

यस पटक अक्सनमा रोयले आफ्नो न्यूनतम मूल्य २ करोड राखेका छन् । यस पटक अक्सनमा ओपनर बेंगलोर, चेन्नई र राजस्थानलाई बढी आवश्यक देखिन्छ । रोय यसअघिको अक्सनमा भन्दा महँगो मूल्यमा विक्न सक्छन् ।

१. टम करन (इंग्ल्यान्ड)

इंग्ल्यान्डका तीव्र गतिका बलिङ अलराउन्डर टम करनलाई राजस्थान रोयल्सले फुकुवा गरेको हो । गतवर्ष उनले राजस्थानबाट खेल्दै अलराउन्ड प्रर्दशन गरेका थिए । २०२० मा राजस्थानले करनलाई न्यूनतम मूल्य १ करोड भारतीय रुपैयाँमा अनुबन्ध गरेको थियो । करनले यस सिजनमा आफ्नो न्यूनतम मूल्य १ करोड ५० लाख भारतीय रुपैयाँ तोकेका थिए । करन इंग्ल्यान्डको सीमित ओभरको क्रिकेटमा पछिल्लो समय नियमित खेल्दै आएका छन् । प्रर्दशन पनि राम्रो छ । उनले तीव्र गतिमा बलिङ गर्नुको साथैं तल्लोक्रममा ठूला सटको क्षमता राख्छन् ।

गत वर्ष उनले ३ विकेट लिनुको साथैं ८४ रन बनाएका थिए । जसक्रममा उनले कोलकाता नाइट राइडर्सविरुद्ध ५४ रनको अविजित इनिङ खेलेका थिए । सुरुमा राजस्थानमा बेन स्टोक्स उपलब्ध नहुँदा पहिलो रोजाईमा खेलेपनि चार विदेशी कोटाका कारण त्यसपछि मौका पाएनन् । राजस्थानले बेन स्टोक्स, जोफ्रा आर्चर, स्टिभ स्मिथ र जस बटलरलाई नियमित खेलाएको थियो । तर यस पटक अक्सनमा करनलाई मुम्बई, पन्जाब, दिल्ली, बेंगलोर, कोलकाताले टोलीमा भित्र्याउन प्रतिस्पर्धा गर्ने अनुमान गरिएको छ ।

यो पनि : आइपिएल अक्सनमा नभएका ३ स्टार खेलाडी