काठमाडौं (हाम्रो खेलकुद) – पेचिलो बन्दै गएको नेपाली क्रिकेटको विवाद समाधान गर्न लागि भन्दै अन्तराष्ट्रिय क्रिकेट काउन्सिल (आइसिसि) ले ६ सदस्यीय सल्लाकार समिति गठन गरेको छ । ६ सदस्यीय भनिएपनि समितिमा अहिले सम्म ४ जनाको मात्र नाम सार्वजनिक गरिएको छ ।
नेपाल क्रिकेट संघ (क्यान) माथि प्रतिबन्ध लगाएको आइसिसिले राष्ट्रिय खेलकुद परिषद् (राखेप) लाई एक पत्र लेख्दै समिति गठनको जानकारी दिएको राखेप सल्लाहकार रोहित दहालले बताएका छन् । समितिमा खेलकुद मन्त्रालयका सहसचिव चडामणि पौडेल, क्यानका पूर्व अध्यक्ष विनयराज पाण्डे, पूर्वकप्तान पवन अग्रवाल पूर्वकार्यवहाक अध्यक्ष दिपक कोइराला रहेका छन् । राखेपका एकजना प्रतिनिधि पनि समितिमा रहनेछन् । अर्का एक सदस्य सल्लाहकार समितिको बैठकबाट चयन गर्न सक्ने पत्रमा उल्लेख रहेको दहालले बताए ।

आइसिसिका फाइनान्स म्यानेजर अमर शेखले सल्लाकार समितिको संयोजन गर्नेछन् । समितिलाई क्रिकेट विवाद समाधानका लागि आवश्यक विधान बनाउने तथा छिटो भन्दा छिटो निष्पक्ष निर्वाचन गराउने जिम्मा दिइएको छ । गत महिना आइसिसिका कार्यकारी प्रमुख डेभिड रिचार्डसनको नेतृत्वमा आएकोे टोलीले प्रधानमन्त्री पुष्पकमल दाहाल, युवा तथा खेलकुद मन्त्री दलजित श्रीपाली , राखेप सदस्य सचिव केशवकुरमा विष्टलगायत सरोकारवाला सँग भेट गरेको थियो । भेटमा नेपाली क्रिकेट विवाद सामधानका लागि राष्ट्रिय क्रिकेट बोर्ड गठन गर्ने र त्यसका लागि सल्लाकार समिति बनाउने सहमति भएको बताइएको थियो । दोहोरो अस्तित्वपछि आइसिसीले वैशाखमा क्यानमाथि प्रतिबन्ध लगाएको थियो । यद्दपी आइसिसीकै संयोजनमा नेपालले अन्तर्राष्ट्रिय क्रिकेटमा भाग लिदै आएको छ ।

मंसिरको अन्त्यमा क्यानको साधारण सभाले चतुरबहादुर चन्दको अध्यक्षतामा कार्यसमिति चयन गरेको थियो । निर्वाचन प्रक्रिया पुरा नगरेको भन्दै राखेपले पुसमा रमेश सिलवालको अध्यक्षतामा तदर्थ समिति गठन गरेको थियो । निर्वाचित समितिले सरकार, राखेपसहित १६ जनाका विरुद्ध सर्वोच्च अदालतमा मुद्दा दर्ता गरेपनि दुवै पक्षलाई अस्वीकार गर्दै आइसिसीले नेपाल माथि प्रतिबन्ध लगाएको थियो । नेपालमाथि प्रतिबन्ध लगाएपनि आइसिसीले नेपाललाई अन्तर्राष्ट्रिय प्रतियोगितामा सहभागी गराइएको छ । नेपालको सहभागिताको संयोजन पनि आइसिसीले नै गरिएको छ ।