एजेन्सी – भारतले इंग्ल्यान्डविरुद्ध तेस्रो डे-नाइट टेस्ट अन्तर्गत पहिलो दिनको खेल सकिँदा उत्कृष्ट प्रर्दशन गरेको छ । पहिलो दिनको समाप्तिमा भारत ३३ ओभरमा ९९-३ को अवस्थामा छ । समग्रमा भारत पहिलो इनिङमा १३ रनले पछि छ । स्पिनरको दबदबा रहँदा पहिलो दिनमा कुल १३ विकेटको गुम्न पुग्यो ।
भारतका ओपनर रोहित शर्मा ८२ बलमा ९ चौका सहित ५७ रनमा अविजित छन् । अजिंक्या रहाने १ रनमा अविजित छन् । दिनको अन्तिम समयमा स्पिनर ज्याक लेचले कप्तान विराट कोहलीलाई २७ रनमा बोल्ड आउट गरे । विराटले ५८ बलमा ३ चौका प्रहार गरे । तेस्रो विकेटका लागि विराट र रोहितले एक सय बलमा ६४ रनको महत्वपूर्ण साझेदारी गरेका थिए । ओपनर सुभमन गिल ११ र चेतेश्वर पुजारा शून्यमा आउट भए । ज्याक लेचले २ र जोफ्रा आर्चरले एक विकेट लिए ।
त्यसअघि अहमदाबादस्थित मोटेरा रंगशालामा टस जितेर ब्याटिङ रोजेको इंग्ल्यान्ड दोस्रो सेसनमा नै १ सय १२ रनमा अलआउट भएको थियो । तेस्रो ओभरमा नै ओपनर डोम सिब्लेको साथ गुमाएको थियो । करिअरको सयौं टेस्ट खेलिरहेका इशान्त शर्माको बलमा सिब्ले खाता नखोली क्याचआउट भए । छैटौं ओभरमा जोनी बेयरस्टो पनि खाता नखोली पेभेलियन फर्केपछि इंग्ल्यान्ड समस्यामा परेको थियो । अक्षर पटेलले उनलाई एलबीडब्लु धरापमा पारेका थिए ।
तेस्रो विकेटका लागि ओपनर ज्याक क्रली र कप्तान जो रुटले ४७ रनको साझेदारी गरे । कप्तान रुट १७ रन जोड्दै रविचन्द्रन आश्विनको बलमा एलबीडब्लु भए । त्यसको तीन ओभरपछि अर्धशतक बनाएका क्रली अक्षर पटेलको बलमा आउट भए । उनले ८४ बलको सामना गर्दै १० चौकाको मदतले ५३ रन जोडे ।
त्यसपछि भरतका स्पिनरले लगातार विकेट खसाले । ओली पोप १ रन, बेन स्टोक्स ६ रन तथा जोफ्रा आर्चर ११ रनमा आउट भए । जाक लिच ३, स्टुआर्ट ब्रोड ३ तथा बेन फोक्स १२ रनमै पेभेलियन फर्किए । भारतका स्पिनर अक्षर पटेलले ६, रवि आश्विनले ३ तथा इशान्त शर्माले १ विकेट लिए ।
