एजेन्सी – न्युजिल्यान्डका ओपनर मार्टिन गुप्टिलले भारतीय क्रिकेट टोलीका ओपनर रोहित शर्माको नाममा रहेको टि २० अन्तर्राष्ट्रिय क्रिकेटमा सर्वाधिक छक्का प्रहार गर्ने कीर्तिमान तोडेका छन् ।

डुनेडिनमा बिहीबार बिहान सम्पन्न अष्ट्रेलियाविरुद्ध दोस्रो टि २० आई खेलमा गुप्टिलले ५० बलमा ६ चौका र ८ छक्का सहित ९७ रनको इनिङ खेल्ने क्रममा रोहितको कीर्तिमान तोडेका थिए । गुप्टिल टि २० अन्तर्राष्ट्रिय खेलमा सर्वाधिक छक्का प्रहार गर्ने ब्याट्सम्यान बनेका छन् ।

गुप्टिल ९६ खेलको ९२ इनिङमा ब्याटिङ गर्दै कुल १ सय ३२ छक्का साथ टि२० आईमा सर्वाधिक छक्का प्रहार गर्ने सूचिमा शीर्षस्थानमा पुगेका छन् । रोहितले १ सय ८ खेलको १ सय इनिङमा ब्याटिङ गर्दै १ सय २७ छक्का प्रहार गरेका छन् ।

सर्वाधिक छक्का प्रहार गर्ने तेस्रो स्थानमा इंग्ल्यान्डका कप्तान ओईन मोर्गन छन् । मोर्गनले ९४ इनिङमा १ सय १३ छक्का प्रहार गरेका छन् । चौथो स्थानमा न्युजिल्यान्डका ओपनर कोलिन मुनरो छन् । मुनरोले ६२ इनिङमा १ सय ७ छक्का प्रहार गरेका छन् । वेस्टइन्डिजका ओपनर क्रिस गेलले ५४ इनिङमा १ सय ५ छक्का प्रहार गर्दै पाँचौ स्थानमा छन् ।

पहिलो खेलमा ५३ रनले विजयी भएको न्युजिल्यान्डले दोस्रो खेलमा ४ रनको रोमान्चक जित निकाल्दै पाँच टि२० आई खेलको सिरिजमा २–० को अग्रता लिएको छ । तेस्रो खेल मार्च ३ मा हुने छ ।