एजेन्सी– भारतीय तीव्र गतिका बलर जस्प्रित बुमराहले इंग्ल्यान्डविरुद्ध चौथो टेष्ट नखेल्ने भएका छन् । बुमराहले ब्यक्तिगत कारण देखाउँदै चौथो टेष्टमा उपलब्ध हुन नसक्ने जनाएपछि भारतीय क्रिकेट कन्ट्रोन्ल बोर्ड (बिसिसिआई) ले उनलाई फुकुवा गरेको छ ।

बुमराह नहुँदा मोहम्मद शिराज वा उमेश यादव मध्य एकले मौका पाउने छन् । बुमराहले इंग्ल्यान्डविरुद्ध पाँच टि२० आई र तीन ओडिआई सिरिज पनि खेल्ने छैनन् । टि२० आई सिरिजको टोली घोषणा भइसक्दा ओडिआईको भने हुँन बाँकी छ ।

चौथो टेष्ट अहमदाबादमा रहेको नरेन्द्र मोदी स्टेडियममा मार्च ४ देखि सुरु हुने छ । चार टेष्ट खेलको सिरिजमा भारतले तीन खेल सकिँदा २–१ को अग्रता लिएको छ । आइसिसी विश्व टेष्ट च्याम्पियनसिपको फाइनलमा स्थान बनाउन भारतलाई अन्तिम खेलमा जित वा वराबरी पर्याप्त हुने छ ।

भारत अन्तिम खेलमा पराजित भएको खण्डमा भने अष्ट्रेलिया फाइनलमा पुग्ने छ । टेष्ट च्याम्पियनसिपको फाइनल आगमी जुनमा लर्ड्समा हुने छ । न्युजिल्यान्डले फाइनलमा स्थान बनाइसकेको छ ।

पहिलो खेलमा इंग्ल्यान्ड २ सय २७ रनले विजयी भएको थियो । दोस्रो खेलमा भारत ३ सय १४ र तेस्रो खेलमा १० विकेटले विजयी हुँदै सिरिजमा अग्रता लिएको छ । अहमदाबादको पिचको स्तरलाई लिएर भने चर्को आलोचना भई रहेको छ ।

पाँच टि२० आई खेल पनि अहमदाबादमै हुने कार्यक्रम छ । पिचको स्तर हेर्दा सर्ने सम्भावना पनि देखिन्छ । तीन ओडिआई सिरिज भने महाराष्ट्र क्रिकेट एसोसियसन पुणेमा हुने तय छ ।