एजेन्सी – अफगानिस्तानका स्टार लेगस्पिनर राशिद खानले जिम्बावेविरुद्ध पहिलो टेष्ट खेल गुमाउने भएका छन् । दुई टेष्ट सिरिज अन्तर्गत पहिलो टेष्ट मंगलबारदेखि संयुक्त अरव इमिरेट्स (यूएई) को शेख जायद स्टेडियम आबूधाबीमा सुरु हुँदैछ ।

पाकिस्तान सुपर लिग (पिएसएल) खेल्ने क्रममा राशिदको औंलामा चोट लागेको थियो । राशिद गत फेब्रुअरी २२ मा पिएसएलमा लाहोर कलन्दर्सबाट क्वेटा ग्याडियटर्सविरुद्ध बलिङ गर्नेक्रममा क्रिस गेलले हानेको सटले औंलामा लाग्दा घाइते भएका थिए ।

जिम्बावेविरुद्ध सिरिजमा अफगानिस्तानले ८ अनक्याप्ड खेलाडीलाई मौका दिएको छ । दोस्रो टेष्ट १० मार्चदेखि सुरु हुने छ । अफगानिस्तान र जिम्बावेले तीन टि२० आई खेल पनि खेल्ने कार्यक्रम छ । पहिलो टि२० खेल १७ मार्चमा हुने छ । दोस्रो १९ र तेस्रो खेल २० मार्चमा हुने छ । सबै खेल आबूधाबीमा हुने छन् ।

राशिद अफगानिस्तानको टोलीमा फर्किएपछि कलन्दर्सले उनको स्थानमा नेपाली लेगस्पिनर सन्दीप लामिछानेलाई टोलीमा समेटेको छ । सन्दीप शनिबार कराँचीतर्फ लागि सकेका छन् ।

लाहोरले ४ मार्चमा इस्लामबाद युनाइटेडविरुद्ध खेल्दै छ । उक्त खेलमा सन्दीपले खेल्ने सम्भावना छ । लाहोर ४ खेलमा ३ मा जित र १ मा हार सहित ६ अंकका साथ दोस्रो स्थानमा छ ।