काठमाडौं (हाम्रो खेलकुद) – काठमाडौं महानगरपालिकाको सहयोगमा नेपाल क्रिकेट संघ (क्यान) ले आयोजना गर्न काठमाडौं मेयर कप–२०७७ को खेल तालिका सार्वजनिक भएको छ ।

प्रतियोगिता फागुन २२ देखि २९ सम्म टियु र मुलपानी क्रिकेट मैदानमा हुने छ । प्रतियोगिता पहिलो खेल फागुन २२ मा गत माघमा सम्पन्न प्रधानमन्त्री कपका विजेता त्रिभुवन आर्मी क्लब र उप विजेता नेपाल एपिएफ क्लबबीच टियुमा प्रतिस्पर्धा हुने छ ।

फागुन २२ मा अर्को खेलमा मुलपानीमा नेपाल पुलिस क्लब र बागमती प्रदेशबीच प्रतिस्पर्धा हुने छ । बागमती र पुलिस प्रधानमन्त्री कपमा सेमिफाइनलबाट बाहिरिएका थिए । पाँच टोली सहभागी यस प्रतियोगितामा मुलपानीमा कुल ४ खेल हुने छन् ।

टियुमा फाइनल सहित ७ खेल हुने छन् । ६ प्रदेशका खेलाडी मिलेर बनेको काठमाडौं मेयर ११ को टोलीले पहिलो खेल फागुन २३ मा मुलपानीमा बागमती प्रदेशसँग खेल्ने छ । सिंगल राउन्ड रोविनको खेलपछि शीर्ष स्थानमा रहने दुई टोली फाइनलमा पुग्ने छन् ।

फाइनल फागुन २९ मा टियु मैदानमा हुने छ । समग्रमा मेयर कपमा लिगका १० र फाइनल एक गरि कुल ११ खेल हुने छन् । फागुन २८ लाई विश्राम दिन राखिएको छ । प्रतियोगिता ५० ओभरको हुने छ । काठमाडौं मेयर ११ टोलीमा बागमती प्रदेश बाहेक अन्य ६ प्रदेशबाट प्रधानमन्त्री कपमा राम्रो प्रर्दशन गर्ने खेलाडी मिलाएर बनाईएको छ ।