एजेन्सी – ओपनर तथा विष्फोटक ब्याट्सम्यान क्रिस गेलले आगामी अक्टोबर नोभेम्बरमा भारतमा हुने टि२० विश्वकप वेस्टइन्डिजले जित्नेमा आशावादी रहेको बताएका छन् ।

बुधबारबाट सुरु हुने श्रीलंकाविरुद्ध टि२० सिरिजमा वेस्टइन्डिजले गेललाई आगमी विश्वकपलाई लक्षित गर्दै दुई वर्षपछि राष्ट्रिय टोलीमा फर्काएको छ । गेल पाकिस्तान सुपर लिग (पिएसएल) छोडेर वेस्टइन्डिज फर्केका छन् । श्रीलंकाविरुद्ध पहिलो टि२० खेल बुधबार एन्टिगुआमा हुँदैछ ।

वेस्टइन्डिजले काइरन पोलार्डको कप्तानीमा बलियो टोली घोषणा गरि सकेको छ । घोषणा टोलीमा गेल, पोलार्ड, निकोलस पुरन, लेन्डन सिमन्स, इभिन लुइस, आन्द्रे फ्लेचर लगायतका विश्व चर्चित टि२० ब्याट्सम्यान छन् । समग्रमा टि २० विश्वकपलाई ध्यान दिँदै खेलाडीलाई मौका दिएको छ ।

‘वेस्टइन्डिजबाट खेल्न इच्छुक र चासो छ भनेर मलाई फोन गरेर सोधेका थिएँ । मैले खेल्न चाहान्छु भने जवाफ दिएँ । किनकी त्यहिँ मेरो मुटु छ । त्यसपछि म पाकिस्तानबाट फर्किएर विश्वकप तयारीको हिस्सा बन्न आएँ, यसले समूहमा एकता प्राप्त गर्ने छ । आशा छ हामीले यो टि२० विश्वकप ट्रफी जित्ने छौं’, गेलले पूनरागमनपछि भने ।

‘मैले वेस्टइन्डिजबाट खेल्न कहिल्यै पनि अस्वीकार गरेन । म फ्रेन्चाइज लिग खेलि रहेको छु । जसबाट सकेसम्म धेरै मानिसलाई मनोरञ्जन प्रदान गर्न चाहान्छु’, उनले भने ।

वेस्टइन्डिजले सन् २०१२ र २०१६ मा टि२० विश्वकप जित्दा गेल टोलीका एक महत्वपूर्ण सदस्य थिए । गत नोभेम्बरमा यूएईमा सम्पन्न इन्डियन प्रिमियर लिग (आइपिएल) मा गेललाई पन्जाब किंग्सले तेस्रो नम्बरमा ब्याटिङ गराएको थियो । गेलले पनि तेस्रो नम्बरमा ब्याटिङ गर्दै उत्कृष्ट प्रर्दशन गरेका थिए ।

वेस्टइन्डिजको टोलीमा अहिले ओपनिङमा गेलसँगै लेन्डन सिमन्स, इभिन लुइस, आन्द्रे फ्लेचर र ब्रेन्डन किंग छन् । टिम ब्यवस्थापनले दिने जुन सुकै नम्बरमा ब्याटिङ गर्न तयार र खुसी भएको गेल बताउँछन् । ‘यो कुनै समस्या होईन, म स्पिन राम्रो खेल्छु । म एक ओपनर हुँ जसले तीव्र गतिको बल पनि त्यतिनै राम्रो खेल्छु । वेस्टइन्डिजले जुनसुकै भूमिका दिएपनि म तयार छु ।’

गेल २०१९ पछि वेस्टइन्डिजको टि२० टोलीमा फर्किएका हुन् ।