काठमाडौं (हाम्रो खेलकुद) – धनगढीमा जारी विद्यालयस्तरीय राष्ट्रिय क्रिकेट प्रतियोगिता चण्डिका ग्रुप लिटल फ्लावर प्रिमियर लिग (एलपिएल) मंगलबार धनगढीको शारदा मावि र कञ्चनपुरको शारदा सरस्वती विजयी भएका छन् ।

दिनको पहिलो खेलमा त्रिनगर माविलाई ६१ रनले पराजित गर्दै शारदाले सुखद सुरुवात गर्यो । संघीय प्रहरी इकाई कार्यालयको खेल मैदानमा टस जितेर पहिले ब्याटिङ गरेको शारदाले निर्धारित २० ओभरमा ९ विकेट गुमाएर १ सय ५८ रन बनायो । लक्की कडायतले सर्वाधिक ६७ रनको योगदान दिए । अभिषेक पालले ३२ र सचिन साउदले २१ रनको योगदान दिए ।

त्रिनगरका खडक नगरकोटीले ४ विकेट र शिशिर थापा मगरले २ विकेट लिए । जितका लागि १ सय ५९ रनको विजयी लक्ष्य पछ्याएको त्रिनगर १६ ओभरमा ९७ रनमा अल आउट भयो । बसन्त थापा मगरले ३० र शिशिर थापा मगरले २८ रन बनाए । शारदाका अभिषेक पालले ५ र लक्की खडायतले २ विकेट लिए ।

दिनको दोस्रो खेलमा कञ्चनपुरको शारदा सरस्वतीले धनगढी नमुनालाई ५ विकेटले पराजित गर्यो । टस जितेर पहिले ब्याटिङ गरेको धनगढी नमुनाले १५.४ ओभरमा ९७ रनमा अल आउट । पारस कार्कीले २१ र सुमित सिंहले २० रन बनाए ।

शारदा सरस्वतीका कैलाश सिंह साउँदले ४ विकेट लिए । जितका लागि ९८ रनको विजयी लक्ष्य पछ्याएको शारदा सरस्वतीले १०.३ ओभरमा ५ विकेट गुमाउँदै पूरा गर्यो । हेमन्त धामीले २५ र गणेश बहादुर विटालुले २३ रन बनाए । धनगढी नमुनाका पारस कार्की र अनुप कुँवरले २-२ विकेट लिए ।