एजेन्सी – आक्रामक ब्याट्सम्यान ग्लेन म्याक्सवेल र कप्तान आरोन फिन्चको उत्कृष्ट अर्धशतकको सहयोगमा अष्ट्रेलियाले न्युजिल्यान्डलाई तेस्रो टि२० आई खेलमा २ सय ९ रनको विशाल लक्ष्य दिएको छ ।

वेलिंग्टनमा टस हारेर ब्याटिङको निम्तो पाएको अष्ट्रेलियाले निर्धारित २० ओभरमा ४ विकेटको क्षतिमा २ सय ८ रन बनायो । अष्ट्रेलियालाई ग्लेन म्याक्सवेलले ३१ बलमा ८ चौका र ५ छक्का सहित सर्वाधिक ७० रनको योगदान दिए ।

म्याक्सवेल टिम साउथीको १८ औं ओभरको अन्तिम बलमा स्विच हिट शट खेल्नेक्रममा इनसाइड एज लागेपछि विकेटकिपर टिम सिफर्टबाट क्याच आउट हुन पुगे । कप्तान आरोन फिन्चले ४४ बलमा ८ चौका र २ छक्का सहित ६९ रन जोडे ।

ओपनर म्याथ्यु वेड ५ रनमा आउट भएपनि तेस्रो नम्बरमा ब्याटिङ गरेका युवा ब्याट्म्यान जोश फिलिपेले २७ बलमा ३ चौका र १ छक्का सहित ४३ रन जोड्दै राम्रो सुरुवात दिलाएका थिए । स्पिनर ईस सोधीले दशौं ओभरको अन्तिम बलमा फिलिपे मार्टिन गुप्टिलबाट क्याच आउट हुन पुगे ।

दोस्रो विकेटका लागि फिलिपे र फिन्चले ५२ बलमा ८३ रनको साझेदारी गर्दै टोलीलाई बलियो योगफलतर्फ अघि बढाएका थिए । तेस्रो विकेटका लागि ग्लेन म्याक्सवेल र फिन्चले ६४ रनको साझेदारी गरेका थिए । १७ औं ओभरमा म्याक्सवेलले मध्यगतिका बलर जेम्श निसमलाई चार चौका र दुई छक्का सहित कुल २८ रन जोडेका थिए ।

मार्कस स्टोइनिस ९ र मिचेल मार्श ६ रनमा अविजित रहे । न्युजिल्यान्डका स्पिनर ईस सोधीले ४ ओभरमा ३२ रन खर्चेर २ विकेट लिए । टिम साउथी र ट्रेन्ट बोल्टले एक एक विकेट लिए । पाँच टि२० आई सिरिजमा सुरुवाती दुबै खेल जित्दै न्युजिल्यान्डले २-० को अग्रता लिएको छ ।