काठमाडौं (हाम्रो खेलकुद) – नेपाली क्रिकेट टोलीका तीब्र गतिका बलर सोमपाल कामी, करण केसी र युवा अलराउन्डर कुशल मल्लले शनिबार सुरु हुने काठमाडौं मेयर कप–२०७७ एकदिवसिय क्रिकेट प्रतियोगिता खेल्ने भएका छन् ।

आर्मीका कप्तान तथा नेपाली क्रिकेट टोलीका विकेटकिपर ब्याट्सम्यान विनोद भण्डारीले सोमपाल, करण र कुशलले काठमाडौं मेयर कप खेल्ने बताएका छन् । यी तीन प्रमुख खेलाडीको पूनरागमनले आर्मी झन बलियो, उत्कृष्ट र सन्तुलित बन्ने विश्वास गरिएको छ ।

उनीहरु तीनै जना विना आर्मीले गत महिना काठमाडौंमा सम्पन्न चौथो संस्करणको प्रधानमन्त्री कप एकदिवसिय क्रिकेट प्रतियोगिताको उपाधि जितेको थियो । त्यहि समयमा उनीहरु संयुक्त अरव इमिरेट्स (यूएई) मा टि१० लिग खेल्न गएका थिए ।

कुशल टिम आबूधाबी, सोमपाल मराठा अरेवियन्स र करण पुणे डेभिल्सबाट टि१० लिग खेलेका थिए । प्रमुख तीन खेलाडी विनानै आर्मीले नेपाल एपिएफ क्लबलाई फाइनलमा ३३ रनले हराउँदै प्रधानमन्त्री कप उपाधि जितेको थियो ।

सोमपालले टि१० लिगमा ६ खेलमा ३ विकेट लिएका थिए । करणले ६ खेलमा १ विकेट मात्र लिएका थिए । करणले टिम आबूधाबीमा ओपनर क्रिस गेलको विकेट लिएका थिए । कुशलले अन्तिम खेलमा कलन्दर्सविरुद्ध डेब्यू गर्दै राम्रो प्रभाव छाड्ने क्रममा १८ रन जोडेका थिए ।

काठमाडौं महानगरपालिकाको सहयोगमा क्यानले मेयर कप आयोजना गर्न लागेको हो । प्रतियोगिता फागुन २२ देखि २९ गते सम्म टियु र मुलपानी क्रिकेट मैदानमा हुने छ । आर्मीले पहिलो खेलमा एपिएफसँग फागुन २२ गते टियु मैदानमा प्रतिस्पर्धा गर्ने छ । आर्मीले दोस्रो खेल टियुमै फागुन २४ मा काठमाडौं मेयर ११ सँग खेल्ने छ । तेस्रो खेल आर्मीले फागुन २५ गते मुलपानीमा नेपाल पुलिस क्लबसँग खेल्ने छ ।

आर्मीले आफ्नो लिग चरणको अन्तिम खेल माघ २७ गते बागमती प्रदेशसँग टियुमा खेल्ने छ । पाँच टोली सहभागी यस प्रतियोगिता सिंगल राउन्ड रोविनपछि शीर्ष स्थानमा दुई टोली फाइनलमा उपाधिको लागि प्रतिस्पर्धा गर्ने छन् । फाइनल फागुन २९ गते टियु मैदानमा हुने छ ।

प्रधानमन्त्री कपको सेमिफाइनलमा पुगेका आर्मी, पुलिस, एपिएफ, बागतमीसँगै काठमाडौं मेयर ११ टोली रहेका छन् । काठमाडौं मेयर–११ मा प्रधानमन्त्री कप क्रिकेटमा उत्कृष्ट प्रर्दशन गर्ने बागमती बाहेक अन्य ६ प्रदेशका खेलाडी रहेका छन् ।