काठमाडौं (हाम्रो खेलकुद) – अलराउन्डर सोनु तामाङलाई समेट्दै बागमती प्रदेशले शनिबार सुरु हुने काठमाडौं मेयर कप–२०७७ एकदिवसिय क्रिकेट प्रतियोगितालाई १५ सदस्य टोली घोषणा गरेको छ ।

बागमतीले गत महिना सम्पन्न चौथो संस्करणको प्रधानमन्त्री कप एकदिवसिय क्रिकेटमा रहेको टोलीबाट तीन परिवर्तन गरेको छ । प्रधानमन्त्री कपमा रहेका ब्याट्सम्यान विभत्सु थापा र लेगस्पिनर तिलकराज भण्डारी टोलीमा छैनन् ।

अलराउन्डर सोनु तामाङ, स्पिनर सोनु देवकोटा र सुबास खत्री बागमतीको टोलीमा मौका पाएका छन् । सुबास प्रधानमन्त्री कपमा वैकल्पिक सूचिमा थिए । बागमतीले प्रशिक्षक परिवर्तन गरेको छ । टोलीको प्रशिक्षकमा कलाम अली छन् । प्रधानमन्त्री कपमा बागमतीको प्रशिक्षक रिकेश लामा थिए ।

बागमती प्रधानमन्त्री कपमा सेमिफाइनलमा त्रिभुवन आर्मीसँग ९४ रनले पराजित भएको थियो । मेयर कप प्रतियोगिता फागुन २२ देखि २९ गते सम्म टियु र मुलपानी क्रिकेट मैदानमा हुने छ । बागमतीले आफ्नो पहिलो खेल मुलपानीमा फागुन २२ मा नेपाल पुलिस क्लबसँग खेल्ने छ । बागमतीले दोस्रो खेल फागुन २३ मा मुलपानीमानै काठमाडौं मेयर ११ सँग खेल्ने छ ।

फागुन २५ मा बागमतीले टियुमा एपिएफसँग खेल्ने छ । लिग चरणको अन्तिम खेल बागमतीले फागुन २७ मा आर्मीसँग खेल्ने छ । पाँच टोली सहभागी यस प्रतियोगिता सिंगल राउन्ड रोविनपछि शीर्ष स्थानमा दुई टोली फाइनलमा उपाधिको लागि प्रतिस्पर्धा गर्ने छन् । फाइनल फागुन २९ गते टियु मैदानमा हुने छ ।

बागमती प्रदेशको टोली : ज्ञानेन्द्र मल्ल (कप्तान), पारस खड्का, पृथु बास्कोटा (उपकप्तान), आदिल खान, ईशान पाण्डे, आकाश थापा, रामनरेश गिरी, नन्दन यादव, सोनु तामाङ, अरियो पौडेल, सोनु देवकोटा, बिपिन आचार्य, सुबास खत्री, दीपेश श्रेष्ठ र गौतम केसी

प्रशिक्षक : कलाम अली, टिम ब्यवस्थापक : सुरज सिलवाल