धनगढी (हाम्रो खेलकुद) – धनगढीमा जारी विद्यालयस्तरीय राष्ट्रिय क्रिकेट प्रतियोगिता चण्डिका ग्रुप लिटल फ्लावर प्रिमियर लिग (एलपीएल) मा बुधबार कैलालीको बाल बाटिका र काठमाडौँको हिमालयन ह्वाइट हाउस विजयी भएका छन् ।

पहिलो खेलमा बाल बाटिकाले बुटवलको न्यू एकेडेमीलाई ६ विकेटले पराजित गर्यो । टस जितेर पहिले ब्याटिङ गरेको न्यू एकेडेमीले १९.३ ओभरमा १ सय ११ रनमा अल आउट भएको थियो । न्यू एकेडेमीका लोकेश जोशीले ५१ रनको अर्धशतकीय इनिङ्स खेलेपनि टोलीको हार टार्न सकेनन् ।

अन्य ब्याट्सम्यानले भने दोहोरो अंकमा रन छुन सकेनन् । बाटिका कमल कुँवरले तीन विकेट लिए । हिमाल मल्ल, विशाल बिक्रम केसी र हेमन्त बुढाले समान २(२ विकेट लिए । कमल ओलीले एक विकेट लिए ।

जितका लागि १ सय १२ रनको विजयी लक्ष्य पछ्याएको बाल बाटिकाले १८.३ ओभरमा ४ विकेट गुमाउँदै पूरा गर्यो । बाल बाटिकाको जितमा कमल ओलीले अविजित ३९, अभिषेक साउदले ३३ र विराट सिंह भण्डारीले ३० रनको योगदान दिए । न्यू एकेडेमीका सुमित पराजुली र सुबेस रावलले १-१ विकेट लिए ।

दोस्रो खेलमा ह्वाइट हाउसले शारदा विद्या निकेतनलाई ३५ रनले पराजित गर्यो । टस जितेर ब्याटिङ गरेको ह्वाइट हाउसले निर्धारित २० ओभरमा ४ विकेट गुमाउँदै १ सय ९२ रन बनाएको थियो । दीपक बोहराले ९३ र सुदिप बस्नेतले २३ रन बनाए ।

शारदाका अरुण धामीले २ तथा नागराज सिंह र दीपक रोकायाले १-१ विकेट लिए । जितका लागि १ सय ९३ रनको विजयी लक्ष्य पछ्याएको शारदाले २० ओभरमा ९ विकेट गुमाउँदै १ सय ५७ रन बनायो । शारदाका दीनेश ओडले ९० र अर्जुन साउँदले २३ रन बनाए ।

ह्वाइट हाउसको जितमा सन्दिप जंग शाहीले ४ र रजत तिमिल्सिनाले २ विकेट लिए । खेलका म्यान अफ द म्याच ह्वाइट हाउसका सन्दिप जंग शाही भए । यो जितसँगै हिमालयन ह्वाइट हाउस सेमिफाइनल नजिक पुगेको छ ।