एजेन्सी – कप्तान तिलकरत्ने दिलशान र उपुल थरंगा चम्कँदा श्रीलंका लेजेन्ड्सले रोड सेफ्टी विश्व टि२० सिरिजमा वेस्टइन्डिज लेजेन्ड्सलाई ५ विकेटले पराजित गरेको छ ।

जितको लागि १ सय ५८ रनको विजयी लक्ष्य पछ्याएको श्रीलंका लेजेन्ड्सले १९ ओभरमा ५ विकेटको क्षतिमा पूरा गर्यो । श्रीलंका उपुल थरंगा ३५ बलमा ८ चौका सहित ५३ रनमा अविजित रहे । दिलशान ३७ बलमा ८ चौका सहित ४७ रनमा आउट भए । सनथ जयसूर्य १२ र चमरा सिल्भा २२ रनमा आउट भए । सिल्भा १५ बलमा २ चौका र १ छक्का प्रहार गरे । वेस्टइन्डिजका सुलिमान बेन र टिनो बेस्टले २–२ विकेट लिए । रायन अस्टिनले १ विकेट लिए ।

त्यसअघि शहिद वीर नारायणसिंह अन्तर्राष्ट्रिय स्टेडियम रायपुरमा टस हारेर पहिला ब्याटिङ थालेको वेस्टइन्डिजले निर्धारित २० ओभरमा ४ विकेटको क्षतिमा १ सय ५७ रन बनाएको थियो । वेस्टइन्डिज लेजेन्ड्सका कप्तान ब्रायन लारा ४९ बलमा ८ चौका सहित ५३ रनमा अविजित रहे ।

टिनो बेस्ट ११ बलमा ३ चौका सहित १८ रनमा अविजित रहे । ओपनर विकेटकिपर विलियम पर्किन्स १९ रनको योगदान दिए । श्रीलंका तिलकरत्ने दिलशान र चिन्थाक जयसिंघे १–१ विकेट लिए ।

यस सिरिज गतवर्ष मार्चमा सुरु भएपनि कोरोना भाइरसको कारण स्थगित हुन पुगेको थियो । प्रतियोगितामा भारत, बंगलादेश, श्रीलंका, दक्षिण अफ्रिका, इंग्ल्यान्ड र वेस्टइन्डिजका लेजेन्डसबीच प्रतिस्पर्धा हुने छ ।