एजेन्सी – काठमाडौं मेयर कप–२०७७ एकदिवसिय क्रिकेट लिग दोस्रो दिन आइतबार काठमाडौं मेयर–११ र बागमती प्रदेशबीच प्रतिस्पर्धा हुँदैछ । खेल विहान ९:३० मा मुलपानी क्रिकेट मैदानमा सुरु हुनेछ ।

टियु मैदानमा नेपाल एपिएफ क्लब र नेपाल पुलिस क्लबबीच प्रतिस्पर्धा हुँदै छ । मुलपानीको खेललाई निकै महत्वपूर्ण साथ हेरिएको छ । काठमाडौं मेयर–११ को कप्तानी नेपाली लेगस्पिनर सन्दीप लामिछाने र बागमती प्रदेशको ज्ञानेन्द्र मल्लले गर्ने छन् । यस खेललाई नेपाली क्रिकेट टोलीका प्रमुख खेलाडी पारस खड्का र सन्दीप लामिछानेबीचको प्रतिस्पर्धाको रुपमा समेत हेरिएको छ ।

पहिलो खेलमा बागमती नेपाल पुलिस क्लबसँग २ रनले पराजित हुन पुग्यो । मुलपानीमै भएको खेलमा ७३ रनको विजयी लक्ष्य पछ्याउने क्रममा बागमती ७० रनमा अल आउट भएको थियो । पारस खड्का शून्यमा आउट भएका थिए । कप्तान ज्ञानेन्द्र मल्लले २२ रन बनाएका थिए । मेयर ११ विरुद्ध पारस, ज्ञानेन्द्र र पृथु बास्कोटालाई उत्कृष्ट प्रर्दशन गर्न आवश्यक देखिन्छ । बलिङमा भने तीव्र गतिका बलर नन्दन यादवले ३ र स्पिनर अरियो पौडेलले ४ विकेट लिएका थिए ।

बागमतीले विपिन आचार्यको स्थानमा सोनु तामाङलाई मौका दिन सक्छ । सोनुले तल्लोक्रममा राम्रो ब्याटिङको क्षमता राख्छन् । पहिलो खेलबाट मुलपानीको पिचको बारे जानकार बागमतीका खेलाडीले त्यसको फाइदा उठाउन सक्छन् ।

यता काठमाडौं मेयर–११ टोलीमा गत महिना चौथो संस्करणको प्रधानमन्त्री कप क्रिकेटमा उत्कृष्ट प्रर्दशन गर्ने ६ प्रदेशका खेलाडी छन् । टोली मजबुत छ । ब्याटिङमा सन्दीप रजाली, अर्जुन कुमाल, सौरभ खनाल लगायतका खेलाडी छन् । काठमाडौं मेयर–११ को टोलीमा सन्दीपलाई प्लेइङ ११ छान्न कठिन पर्ने देखिन्छ ।

प्रधानमन्त्री कपमा उत्कृष्ट प्रर्दशन गरेका विवेक यादव बागमतीलाई घातक बन्न सक्छन् । सन्दीप तीन वर्षपछि घरेलु क्रिकेटमा फर्किदै छन् । सन्दीपलाई आफ्नो खेलाडीबारे त्यति धेरै जानकार भने छैन । जुन टोलीलाई घातक बन्न सक्छ ।

अर्को खेलमा टियुमा पुलिस र एपिएफ भिड्ने छन् । दुबै लगातार दोस्रो जितको खोजिमा छन् । पहिलो खेलमा पुलिसले बागमतीलाई २ रनले हराएको थियो । खराब ब्याटिङ गरेको पुलिसलाई दीपेन्द्रसिंह ऐरी र ललित नारायण राजवंशीले उत्कृष्ट बलिङका साथ जित दिलाएका थिए । पुलिसका ब्याट्सम्यानलाई जिम्मेवारी प्रर्दशन गर्न आवश्यक देखिन्छ ।

एपिएफले आर्मीलाई १ विकेटले हराएको थियो । २ सय ३६ रनको विजयी लक्ष्य पछ्याउने क्रममा ४–१६ को कमजोर अवस्थाबाट अन्तिम ओभरमा लक्ष्य पूरा गरेको थियो । एपिएफको जितमा सुमित महर्जन, अंमर सिंह राउटेला र वसन्त रेग्मीले उत्कृष्ट प्रर्दशन गरेका थिए । उक्त जितले एपिएफका खेलाडीको मनोबल उच्च छ । एपिएफका शीर्षक्रमका ब्याट्सम्यान शरद भेषावकर, सुबास खकुरेल र आसिफ शेखलाई आजको खेलमा उच्च प्रर्दशन गर्न आवश्यक देखिन्छ ।