एजेन्सी – ओपनर मार्टिन गुप्टिलको उच्च प्रर्दशनमा न्युजिल्यान्डले पाँचौं तथा अन्तिम टि२० आई खेलमा अष्ट्रेलियालाई ७ विकेटले पराजित गरेको छ । यो सँगै पाँच टि२० आई सिरिज न्युजिल्यान्डले ३–२ ले जितेको हो ।

आइतबार विहान जितको लागि १ सय ४३ रनको विजयी लक्ष्य पछ्याएको न्युजिल्यान्डले १५.३ ओभरमा ३ विकेटको क्षतिमा पूरा गर्यो । न्युजिल्यान्डको जितमा ओपनर मार्टिन गुप्टिलले ४६ बलमा ७ चौका र ४ छक्का सहित ७१ रनको विजयी इनिङ खेले ।

पहिलो विकेटका लागि मार्टिन गुप्टिल र देभन कन्वेले ११.५ ओभरमा १ सय ६ रनको उत्कृष्ट साझेदारी गरेपछि सहज जित हात पारेको हो । कन्वे २८ बलमा ३ चौका र १ छक्का सहित ३६ रनमा क्याच आउट भए । केन विलियम्सन गोल्डेन डक आउट हुँदा ग्लेन फिलिप्स ३४ रनमा अविजित रहे । फिलिप्स १६ बलमा ५ चौका र २ छक्का प्रहार गरे । अष्ट्रेलिया तीव्र गतिका बलर राइली मेरीडिथले २ र झेय रिचर्डसनले १ विकेट विकेट लिए ।

त्यसअघि स्टपाक स्टेडियम वेलिंग्टनमा टस जितेर पहिला ब्याटिङ रोजेको अष्ट्रेलियाले निर्धारित २० ओभरमा ८ विकेटको क्षतिमा १ सय ४२ रन बनाएको थियो । अष्ट्रेलिया म्याथ्यु वेडले २९ बलमा ३ चौका र २ छक्का सहित सर्वाधिक ४४ रनको योगदान दिए । कप्तान आरोन फिन्चले ३२ बलमा ५ चौका र १ छक्का सहित ३६ रनमा आउट भए । मार्कस स्टोइनिस २६, ग्लेन म्याक्सवेल १, मिचेल मार्श १० रनमा आउट भए ।

न्युजिल्यान्डका लेगस्पिनर ईश सोधीले ४ ओभरमा २४ रन खर्चेर ३ विकेट लिए । ट्रेन्ट बोल्ट र टिम साउथीले २–२ विकेट लिए । न्युजिल्यान्ड पहिलो खेलमा ५३ र दोस्रो खेलमा ४ रनले विजयी भएको थियो । तेस्रो र चौथो खेल अष्ट्रेलियाले ६४ रन र ५० रनले जितेको थियो ।