काठमाडौं (हाम्रो खेलकुद) – तीव्र गतिका बलर नन्दन यादव र रामनरेश गिरीको उत्कृष्ट बलिङसँगै काठमाडौं मेयर कप–२०७७ एकदिवसिय क्रिकेट लिगमा बागमती प्रदेशविरुद्ध काठमाडौं मेयर–११ ले खराब सुरुवात गरेको छ ।
मुलपानी क्रिकेट मैदानमा टस हारेर पहिला ब्याटिङ थालेको मेयर–११ ले सुरुवाती १६ ओभरमा ५ विकेट गुमाउँदै ४९ रन बनाएको छ । मेयर-११ सन्दीप रजाली ९ रन र सिद्धान्त लोहनी उनलाई साथ दिएका छन् ।
तीव्र गतिका बलर रामनरेश गिरीले पाँचौं ओभरको तेस्रो बलमा ओपनर हरि शंकर शालाई विकेटकिपर आकाश थापाबाट ६ रनमा क्याच गराउँदै पहिलो सफलता दिलाए । उक्त समय टोलीको कुल रन १६ थियो । दशौं ओभरको चौथो बलमा विपिन रावल ईशान पाण्डेबाट ११ रनमा समातिन पुगे । तीव्र गतिका बलर नन्दन यादवको बलमा विपिन क्याच हुन पुगे । एक बलपछि नन्दनले युवा ओपनर अर्जुन कुमाललाई ८ रनमा बोल्ड आउट गरे । अर्जुनले ३३ बल खेल्दा चौका छक्का भने प्रहार गर्न सकेनन् ।
१३ औं ओभरको पहिलो बलमा रामनरेश गिरीले कृष्ण कार्कीलाई शून्यमा एलबिडब्लू आउट गर्दै ३७–४ को अवस्थामा पुर्याए । नन्दनले विवेक यादवलाई १४ औं ओभरको तेस्रो बलमा एक रनमा विकेटकिपर आकाश थापाबाट क्याच गराउँदै पेभिलिएन फर्काएपछि मेयर–११ को टोली ४३–५ को संकट अवस्थामा पुगेको थियो ।
