काठमाडौं (हाम्रो खेलकुद) – काठमाडौं मेयर कप–२०७७ एकदिवसिय क्रिकेट लिगमा नेपाल पुलिस क्लबका दीपेन्द्र सिंह ऐरीले नेपाल एपिएफ क्लबबिरुद्ध अर्धशतक प्रहार गरेका छन् ।
टियु क्रिकेट मैदानमा टस जितेर पहिला ब्याटिङ थालेको पुलिसले ३४ ओभरमा ४ विकेट गुमाउँदै १ सय २१ रन बनाएको छ । पुलिसका दीपेन्द्र सिंह ऐरी ८० बलमा ५ चौका र १ छक्का सहित ५० रनमा अविजित छन् । दीपेन्द्रले ८० बलमा अर्धशत पूरा गरे । पवन सरार्फ १५ बलमा ३ छक्का सहित २२ रनमा अविजित छन् ।
कमजोर सुरुवात गरेको पुलिसलाई तेस्रो विकेटका लागि सुनिल धमला र दीपेन्द्रले ५९ रनको साझेदारी गर्दै इनिङ सम्हालेका थिए । धमलालाई २९ औं ओभरको दोस्रो बलमा शरद भेषावकरले ३३ रनमा बोल्ड आउट गरे । धमलाले ७२ बलमा २ चौका प्रहार गरे ।
पाँचौं ओभरको अन्तिम बलमा ओपनर कुशल भुर्तेल १० रनमा रन आउट भए । आठौं ओभरको अन्तिम बलमा तीव्र गतिका बलर अमर सिंह राउटेलाले अमित श्रेष्ठलाई १ रनमा सन्दीप जोराबाट क्याच गराउँदा पुलिस २२–२ को कमजोर अवस्थामा पुगेको थियो । कप्तान मन्जित श्रेष्ठ ३ रनमा आउट भए ।
