काठमाडौं (हाम्रो खेलकुद) – काठमाडौं मेयर–११ का कप्तान सन्दीप लामिछानेले काठमाडौं मेयर कप–२०७७ एकदिवसिय क्रिकेट लिगमा बागमती प्रदेशविरुद्ध विष्फोटक ब्याटिङ गरेका छन् ।

मुलपानी क्रिकेट मैदानमा टस हारेर पहिला ब्याटिङको निम्तो पाएको मेयर–११ ले ४० ओभरमा ८ विकेट गुमाउँदै १ सय ८६ रन बनाएको छ । मेयर ११ का कप्तान सन्दीप लामिछानेले २० बलमा ६ छक्का ४२ रनमा क्याच आउट भएका छन् । सन्दीप नन्दन यादवको ४० औं ओभरको तेस्रो बलमा ठूलो सट खेल्ने धुनमा मिडअफमा ज्ञानेन्द्र मल्लबाट समातिन पुगेपछि अर्धशतक बनाउन चुकेका छन् । सौरभ खनाल १७ रनमा खेलि रहेका छन् ।

सन्दीप ३४ औं ओभरको चौथो बलमा सन्दीप रजाली आउट भएपछि मैदान छिरेका थिए । स्पिनर अरियो पौडेललाई आफूले सामना गरेको पहिलो बलमै छक्का प्रहार गर्दै सन्दीपले सुरुवात गरे ।
तीव्र गतिका बलर रामनरेश गिरीले पाँचौं ओभरको तेस्रो बलमा ओपनर हरि शंकर शाहलाई विकेटकिपर आकाश थापाबाट ६ रनमा क्याच गराउँदै पहिलो सफलता दिलाए ।

दशौं ओभरको चौथो बलमा विपिन रावल ईशान पाण्डेबाट ११ रनमा समातिन पुगे । तीव्र गतिका बलर नन्दन यादवको बलमा विपिन क्याच हुन पुगे । एक बलपछि नन्दनले युवा ओपनर अर्जुन कुमाललाई ८ रनमा बोल्ड आउट गरे ।

१३ औं ओभरको पहिलो बलमा रामनरेश गिरीले कृष्ण कार्कीलाई शून्यमा एलबिडब्लू आउट गर्दै ३७–४ को अवस्थामा पुर्याए । नन्दनले विवेक यादवलाई १४ औं ओभरको तेस्रो बलमा एक रनमा विकेटकिपर आकाश थापाबाट क्याच गराउँदै पेभिलिएन फर्काएपछि मेयर–११ को टोली ४३–५ को संकट अवस्थामा पुगेको थियो । तर त्यसपछिका ब्याट्सम्यानले भने इनिङ सम्हाले ।

छैटौं विकेटका लागि सिद्धान्त लोहनी र सन्दीप रजालीले ७१ रनको महत्वपूर्ण साझेदारी गरेका थिए । स्पिनर अरियो पौडेलले ३२ औं ओभरको पहिलो बलमा सिद्धान्तलाई ३४ रनमा बोल्ड गर्दै साझेदारी तोडेका थिए । सिद्धान्तले ६७ बलमा ३ चौका प्रहार गरे । सन्दीप रजालीले ५८ बलमा ४ चौका प्रहार गरे ।