काठमाडौं (हाम्रो खेलकुद) – युवा ब्याट्सम्यान दीपेन्द्र सिंह ऐरीको सानदार शतकको सहयोगमा नेपाल पुलिस क्लबले काठमाडौं मेयर कप–२०७७ एकदिवसिय क्रिकेट लिगमा नेपाल एपिएफ क्लबलाई २ सय ५९ रनको बलियो लक्ष्य दिएको छ ।

टियु क्रिकेट मैदानमा टस जितेर पहिला ब्याटिङ थालेको पुलिसले ५० ओभरमा ७ विकेट गुमाउँदै २ सय ५८ रन बनायो । दीपेन्द्रले १ सय ३१ बलमा ११ चौका र ६ छक्का सहित १ सय ४० रनको सानदार शतकीय इनिङ खेले ।

दीपेन्द्रले आफ्नो करिअरको पहिलो शतक अभिनाश बोहरालाई छक्का प्रहार गर्दै १ सय २० पूरा गरेका थिए । पहिलो अर्धशतक ८० बलमा पूरा गरेका दीपेन्द्रले त्यसपछि आफ्नो रनको गति बढाउँदै सानदार शतकीय इनिङ खेले ।

पाँचौं ओभरको अन्तिम बलमा ओपनर कुशल भुर्तेल १० रनमा रन आउट भए । आठौं ओभरको अन्तिम बलमा तीव्र गतिका बलर अमर सिंह राउटेलाले अमित श्रेष्ठलाई १ रनमा सन्दीप जोराबाट क्याच गराए । कप्तान मन्जित श्रेष्ठ ३ रनमा आउट भए ।

कमजोर सुरुवात गरेको पुलिसलाई तेस्रो विकेटका लागि सुनिल धमला र दीपेन्द्रले ५९ रनको साझेदारी गर्दै इनिङ सम्हालेका थिए । धमलालाई २९ औं ओभरको दोस्रो बलमा शरद भेषावकरले ३३ रनमा बोल्ड आउट गरे । धमलाले ७२ बलमा २ चौका प्रहार गरे । पवन सरार्फले ३० बलमा ४ छक्का सहित ३५ रनमा आउट भए । अनिल शाह १८ रनमा आउट भए ।

एपिएफका कप्तान शरद भेषावकरले १० ओभरमा ४२ रन खर्चेर ३ विकेट लिए । अभिनाश बोहराले २ र अमर सिंह राउटेला १ विकेट लिए