काठमाडौं (हाम्रो खेलकुद) – आइसिसी महिला विश्वकप एसिया छनोटबाट बाहिरिसकेको नेपालले आफ्नो अन्तिम खेलमा चीनलाई ४ विकेटले हराएको छ । ८६ रनको लक्ष्य पछ्याएको नेपालले १७.३ ओभरमा ६ विकेट गुमाएर ८८ रन बनाएको थियो । चीनलाई पहिलो खेलमा पनि नेपालले हराएको थियो ।
पूर्व कप्तान नेरी थापा र सीता मगरको ब्याटिङमा नेपालले लक्ष्य प्राप्त गरेको थियो । ओपनर सीताले २४ बलमा १ चौकासहित २० रन बनाइन् । नेरीले २७ बलमा १ चौका साथ २२ रन जोडिन् । कप्तान रुविना क्षेत्रीले अविजित १३ , इन्दु बर्माले १० रन बनाइकी थिइन् ।
त्यसअघि टस जितेर ब्याटिङ गरेको चीनले निर्धातिर २० ओभरमा ७ विकेट गुमाएर ८५ रन बनाएको थियो । चीनका लागि ओपनर जो मियो र फेगफेग सङबाहेक चाइ युडियनले दोहोरो अंकमा रन बनाएका थिए । सङले सर्वाधिक ३४ रन तथा मियोले १८ रन बनाइकी थिइन् । याडियनले १० रन जोडिन् ।
नेपालका लागि कप्तान रुविना क्षेत्रीले २ विकेट लिइन् । ४ ओभर बलिङ गरेकी उनले १० रन मात्र खर्चेकी थिइन् । रुविना प्लेयर अफ दि म्याच चुनिएकी थिइन् । निर्मला शाही र करुणा भण्डारीले समान १ विकेट लिएकी थिइन् ।
नेपालले आफ्ना ६ मध्ये ३ मा जित र ३ मा हार बेहोर्दै छनोटको यात्रा टुंगाएको छ । शुक्रबार थाइल्यान्डसँग १ विकेटको हारसँगै नेपाल छनोटबाट बाहिरिएको थियो । थाइल्यान्डसँगको दुवै खेल हारेको नेपाल अर्को खेलमा हङकङ पराजित भएको थियो । चीनलाई दुवै खेलमा हराएको नेपालले अर्को एउटा खेलमा हङकङमाथि जित निकालेको थियो ।
