काठमाडौं (हाम्रो खेलकुद)– आइसिसी महिला विश्वकप एसिया छनोटमा दोस्रो भएर मंगलबार हङकङबाट स्वदेश फर्केको महिला राष्ट्रिय क्रिकेट टोलीलाई युवा तथा खेलकुद मन्त्रालयले प्रोत्साहनस्वरुप खेलाडीसहित टोलीका सम्पूर्ण सबैलाई जनही २५ हजार रुपैयाँ प्रदान गर्ने भएको छ ।

बुधबार मन्त्रालयमा आयोजित खेलाडी सम्मान कार्यक्रममा युवा तथा खेलकुद मन्त्री दलजित श्रीपाइलीले पुरस्कारको घोषणा गरेका हुन् । छनोटमा दोस्रो हुँदै नेपाल नोभेम्बरमा थाइल्यान्डमा हुने एसिया कपका लागि छनोट भएको थियो । नेपाली क्रिकेट टोलीकी कप्तान रुविना क्षेत्रीले खेलाडीहरुको मनोवल उकास्न मन्त्रालय, राष्ट्रिय खेलकुद परिषद सवै तर्फबाट सहयोग र प्रोत्साहन हुनु पर्ने बताईन् ।

मन्त्री श्रीपाइली खेलाडीले एसिया कपमा पनि विजय प्राप्त गर्ने विश्वास गरे । उनले खेलाडीहरुको जीवन विमा र स्वास्थ्य विमाको व्यवस्था समेत गर्नु पर्ने बताए ।
राष्ट्रिय खेलकुद परिषदका उपाध्यक्ष लामा टेन्डी शेर्पाले नेपाली खेलकुदमा महिला खेलाडीहरुको उचाई बढ्दै गएकोमा खुसी व्यक्त गरे । नेपाली टोलीका प्रशिक्षक राजु बस्नेतले छोटो समयमा खेलाडी छनोट लगायत सम्पूर्ण व्यवस्थापन गर्नुपर्नाका वावजुद खेलाडीहरुले प्राप्त गरेको नतिजा प्रति आफु सन्तुष्ट रहेको बताए ।
कार्यक्रममा युवा तथा खेलकुद मन्त्रालयका सचिव महेश प्रसाद दाहाल र सह–सचिव चुडामणी पौडेल, राष्ट्रिय खेलकुद परिषदका सदस्यद्वय शैलेष कर्माचार्य र याम कुमारी गुरुङ्ग अस्मिता, प्रशासन विभाग प्रमुख मधुसुदन बस्नेत, ओलम्पियन संगिना बैद्य र दीपक विष्टको समेत उपस्थिती रहेको थियो ।