काठमाडौं (हाम्रो खेलकुद) – क्रिकेट संघ नेपाल (क्यान) को आयोजनामा जारि टि२० ट्राइ सिरिज अन्तर्गत दोस्रो खेलमा आज नेदरल्यान्ड्स र मलेसिया भिड्दैछन् । खेल नेपाली समय १२:१५ बजे कीर्तिपुरस्थित टीयु अन्तर्राष्ट्रिय क्रिकेट मैदानमा हुनेछ ।

पहिलो खेलमा नेपालविरुद्ध फराकिलो हार बेहोरेको नेदरल्यान्ड्स मलेसियाविरुद्ध जित हासिल गर्दै सिरिजमा फर्कने लक्ष्यमा हुनेछ । यता प्रतियोगितामा पहिलो खेल खेल्न लागेको मलेसिया सुखद सुरुवात गर्ने सुरमा हुनेछ । कागजमा नेदरल्यान्ड्स तुलनात्मक रुपमा बलियो भएपनि नेपाली पिचमा डच टोलीले संघर्ष गरिरहेको छ ।

नेपालविरुद्ध हारपछि नेदरल्यान्ड्सका कप्तान पिटर शिलारले टोलीको खराब प्रदर्शनको खुलेर आलोचना गरेका थिए । अधिकांश युवा खेलाडी उतारेको टोलीलाई मलेसियाविरुद्ध उच्च प्रदर्शन गर्न निकै दबाब छ । विशेषगरी बलिङ र फिल्डिङमा टोलीले निकै सुधार गर्नुपर्ने देखिन्छ ।

यता मलेसिया प्रतियोगितामा कमजोर टोली मानिएपनि पछिल्लो समय राम्रो नतिजा निकाल्दै आएको छ । युवा खेलाडीको वर्चस्व रहेको टोलीमा आक्रामक ब्याट्सम्यानको बाहुल्यता छ । अलराउन्डर विरनदिप सिंहको प्रदर्शन महत्त्वपूर्ण हुनेछ ।

नेदरल्यान्ड्सको टोली : पिटार सीलार (कप्तान), टोबियस भिसे, बेन कुपर, म्याक्स ओडिवड, बास डी लीडे, विक्रमजित सिंह, स्कर्ट एडवार्डस, आर्यन दत्त, फिलिपे बोइससेवेन, पल पान मीकेरन, भिभिन किंगमा, टोनी स्टल, सेबस्टियान ब्राट र जुलियन डी म

मलेसियाको टोली : अहमद फेज, विरनदिप सिंह, ऐनोल हफिज्स, अमिनुदीन राम्ली, अनवर अरुदीन, अनवर रहमान, फित्री शाम, खिजार हायत, धिवेंद्रण मोगन, मुहमद वाफिक, शर्विन मुनींदी, पवनदीप सिंह, शफिक सरिफ, स्यार्जुल इद्रुस, सायद अजिज