एजेन्सी – ओपनर शिखर धवनको उत्कृष्ट ब्याटिङको सहयोगमा इन्डियन प्रिमियर लिग (आइपिएल) मा दिल्ली क्यापिटल्सले पन्जाब किंग्समाथि ६ विकेटको सानदार जित निकालेको छ । जितको लागि १ सय ९६ रनको विजयी लक्ष्य पछ्याएको दिल्लीले १८.२ ओभरमा ४ विकेट गुमाउँदै पूरा गर्यो ।

दिल्लीको जितमा ओपनर शिखर धवनले ४९ बलमा १३ चौका र २ छक्का सहित सर्वाधिक ९२ रनको योगदान दिए । तीव्र गतिका बलर झेय रिचर्ड्सनले १५ औं ओभरको पाँचौं बलमा बोल्ड आउट गरेपछि धवन आफ्नो आइपिएल करिअरको तेस्रो शतक बनाउन ८ रनले चुकेका थिए । ओपनर पृथ्वी शा १७ बलमा ३ चौका र २ छक्का सहित ३२ रनमा क्याच आउट भए ।

ओपनर पृथ्वी शा र शिखर धवनले पहिलो विकेटका लागि ५.३ ओभरमा ५९ रनको साझेदारी गर्दै राम्रो सुरुवात दिलाएका थिए । शा लाई अर्शदीप सिंहले क्रिस गेलबाट क्याच आउट गराउँदै साझेदारी तोडेका थिए । डेब्यू खेल खेलेका स्टिभ स्मिथ १२ बलमा ९ रनमात्र बनाउन सके मार्कस स्टोइनिस १३ बलमा ३ चौका र १ छक्का सहित २७ रनमा अविजित हुँदै टोलीको जित पक्का गरे । ऋषभ पन्त १६ बलमा १ छक्का सहित १५ रनमा आउट भए । ललित यादव १२ रनमा अविजित रहे ।

पन्जाबका झेय रिचर्ड्सनले ४ ओभरमा ४१ रन खर्चेर २ विकेट लिए । अर्शदीप सिंह र राइली मेरेडिथले १–१ विकेट लिए ।

त्यसअघि वानखडे स्टेडियम मुम्बईमा टस हारेर पहिला ब्याटिङ थालेको पन्जाबले निर्धारित २० ओभरमा ४ विकेट गुमाउँदै १ सय ९५ रन बनाएको थियो । पन्जाबका कप्तान लोकेश राहुलले ५१ बलमा ७ चौका र २ छक्का सहित ६१ रनको अर्धशतकीय इनिङ खेले । अर्का ओपनर मयंक अग्रवालले ३६ बलमा ७ चौका र ४ छक्का सहित सर्वाधिक ६९ रनको योगदान दिए ।

ओपनर लोकेश राहुल र मयंक अग्रवालले पहिलो विकेटका लागि १२।४ ओभरमा १ सय २२ रनको शतकीय साझेदारीका साथ राम्रो सुरुवात दिलाएका थिए । डेब्यू खेल खेलेका तीव्र गतिका बलर लुकमान मेरिवालाले अग्रवाललाई धवनबाट क्याच गराउँदै साझेदारीमा ब्रेक लगाएका थिए । कागिसो रबाडाले १६ औं ओभरको दोस्रो बलमा राहुललाई स्टोइनिसबाट क्याच आउट गराए । क्रिस गेल ९ बलमा १ छक्का सहित ११ रनमा क्याच आउट भए ।

यस सिजनको सुरुवाती दुई खेलमा शून्यमा आउट भएका निकोलस पुरन ८ बलमा ९ क्याच आउट भए । युवा ब्याट्सम्यान शाहरुख खान ५ बलमा २ चौका र १ छक्का सहित १५ रनमा अविजित रहे । दिपक हुड्डा १३ बलमा २ छक्का सहित २२ रनमा अविजित रहे । दिल्लीका क्रिस वोक्स, कागिसो रबाडा, आवेस खान र लुकमान मेरिवालले १-१ विकेट लिए

अंक तालिका

दिल्लीले अव आफ्नो चौथो खेल मंगलबार मुम्बई इन्डियन्ससँग खेल्ने छ । पन्जाबले बुधबार सनराइजर्स हैदराबादसँग खेल्ने छ । रोयल च्यालेन्जर्स बेंगलोर ३ खेलमा ६ अंकका साथ शीर्ष स्थानमा उक्लिएको छ । दिल्ली क्यापिटल्स ३ खेलमा २ मा जित र १ मा हार सहित दोस्रो स्थानमा उक्लिएको छ । मुम्बई ३ खेलमा २ मा जित र १ मा हार सहित ४ अंकका साथ तेस्रो स्थानमा छ । चेन्नई सुपर किंग्स २ खेलमा १ मा जित र १ मा हार सहित २ अंक जोड्दै चौथो स्थानमा छ । समान २ अंकका साथ राजस्थान रोयल्स पाँचौं, कोलकाता नाइट राइडर्स छैटौं र पन्जाब सातौं स्थानमा छन् । हैदराबाद अंक विहिन हुँदै पुछारमा छ ।