काठमाडौं (हाम्रो खेलकुद) – त्रिकोणात्मक टि२० आई सिरिज अन्तर्गत तेस्रो खेलमा आज नेपाल र मलेसियाबीच प्रतिस्पर्धा हुँदैछ । खेल दिउँसो १:१५ बजे टियु क्रिकेट मैदानमा सुरु हुनेछ ।

घरेलु टोली नेपाल लगातार दोस्रो जितको सोचमा हुनेछ । पहिलो खेलमा नेपालले नेदरल्यान्ड्सलाई ९ विकेटले पराजित गरेको थियो । दोस्रो खेलमा मलेसिया नेदरल्यान्ड्ससँग १५ रनले पराजित भएको थियो । पहिलो खेलको प्रदर्शनले घरेलु टोली नेपालको मनोबल उच्च छ ।

नेदल्यान्ड्स आफ्नो प्रमुख खेलाडी विनानै नेपाल आउँदा बलिङ लाइनअप कमजोर देखिएको छ । पछिल्लो समय मलेसियाले नेपाललाई कडा प्रतिस्पर्धा दिँदै आएको छ । गतवर्ष फ्रेबुअरीमा थाईल्यान्डमा एसिसी इस्टर्न रिजन टि२० छनोटमा मलेसियाले नेपाललाई २२ रनले हराएको थियो । जुन मलेसियाले टि२० आईमा जित निकालेको सर्वाधिक ठूलो विपक्षी टोली थियो । पहिलो खेलमा बलिङ र ब्याटिङ दुबैमा उच्च प्रदर्शन गरेको नेपालबाट दोस्रो खेलमा पनि त्यस्तै प्रदर्शनको अपेक्षा गरिएको छ ।

नेदरल्यान्ड्ससँगको खेलबाट नेपालले टोलीमा परिवर्तन गर्ने सम्भावना भने न्यून छ । ब्याटिङमा ओपनर कुशल भुर्तेल र आसिफ शेखले उत्कृष्ट अर्धशतकीय इनिङ खेलेका थिए । कुशल ६२ रनमा आउट हुँदा आसिफ ५४ रनमा अविजित रहेका थिए । यी दुई ओपनरले पहिलो विकेटका लागि १२.४ ओभरमा १ सय १६ रनको उत्कृष्ट साझेदारी गरेका थिए । नेपालको लागि टि२० आईमा पहिलो विकेटका लागि गरेको उच्च साझेदारी समेत हो ।

टि२० आईमा डेब्यू खेलाडीले गरेको उच्च साझेदारीमा विश्व कीर्तिमान पर्छ । पहिलो खेलमा मध्यक्रम र तल्लोक्रमको ब्याटिङ परिक्षण हुन पाएन । त्यसैले ब्याटिङमा परिवर्तन गर्ने कुनै आधार र सम्भावना छैन । ज्ञानेन्द्र मल्ल, दीपेन्द्रसिंह ऐरी र आरिफ शेखबाट मध्यक्रममा ठूलो इनिङ खेल्नुपर्ने हुन्छ । विनोद भण्डारी फिनिसरको रुपमा खेल्ने छन् ।

करण केसी र सोमपाल कामी पहिलो रोजाईका तीव्र गतिका बलर हुन् । अभिनाश डेथ ओभर विशेष मानिन्छन् । लेग स्पिनर सन्दीप लामिछाने टोलीका प्रमुख हतियार हुन् । करण र सोमपाल तल्लोक्रममा राम्रो ब्याटिङको क्षमता राख्छन् । स्पिनरमा सन्दीप लामिछानेलाई साहब आलमनै साथ दिने सम्भावना छ ।

साहबले डेब्यू खेलमा नेदरल्यान्ड्सँग ४ ओभरमा ४५ रन खर्चेर १ विकेट लिएका थिए । केहि महँगो सावित भएपनि टोलीले उनीमाथि थप विश्वास गर्ने सम्भावना छ । एकै खेलको प्रदर्शनको आधारमा हटाउदा खेलाडीको मनोबलमा असर पर्नुको साथै आत्माविश्वासमा कमी आउँछ । उनको विकल्पमा सुशन भारी छन् । पछिल्लो समय घरेलु क्रिकेटमा भारी भन्दा साहब अब्बल रहँदै आएका छन् ।

युवा अलराउन्डर कुशल मल्ल, तीव्र गतिका बलर कमलसिंह ऐरी, सुशन भारी र युवा ब्याट्सम्यान सन्दीप जोरा पहिलो खेलमा बेन्चमा बसेका थिए । मलेसियासँग पनि बेन्चमा रहने सम्भावना छ । यी चार खेलाडीलाई मौका दिने ठाउँ देखिदैन ।

नेपालको सम्भावित प्लेइङ ११ : ज्ञानेन्द्र मल्ल (कप्तान), दीपेन्द्रसिंह ऐरी, विनोद भण्डारी, सोमपाल कामी, करण केसी, सन्दीप लामिछाने, अभिनाश बोहरा, आरिफ शेख, आसिफ शेख, कुशल भुर्तेल र साहब आलम ।