काठमाडौं (हाम्रो खेलकुद) – नेपाली क्रिकेट टोलीका उपकप्तान दीपेन्द्रसिंह ऐरीले टि२० आई खेलमा आफ्नो करिअरको पहिलो विकेट लिएका छन् । त्रिकोणात्मक टि२० सिरिजत अन्तर्गत तेस्रो खेलमा मलेसियाविरुद्ध नेपाललाई चौथो सफलता दिलाउनेक्रममा दीपेन्द्रले पहिलो विकेट लिएका हुन् ।

टियु क्रिकेट मैदानमा टस हारेर पहिला ब्याटिङ थालेको मलेसियाले ९ ओभरमा ४ विकेट गुमाउँदै ६१ रन बनाएका छ । मलेसिया शफिक शरिफ ९ र शर्विन मुनींदी ५ रनमा खेलि रहेका छन् ।

दोस्रो ओभरको चौथो बलमा करण केसीले ओपनर अनवार अरुद्दीनलाई विकेटकिपर विनोद भण्डारीबाट ८ रनमा क्याच गराउँदै पहिलो सफलता दिलाए । अनवार सट खेल्नेक्रममा एज लागेपछि आउट हुन पुगेका थिए । ओपनर अनवार र सायद अजिजले पहिलो विकेटका लागि १७ रनको साझेदारी गरेका थिए ।

तेस्रो ओभरमा आफ्नो पहिलो स्पेल लिएर आएका स्पिनर सन्दीप लामिछानेले २ चौका र १ छक्का सहित १५ रन खर्चेका थिए । चौथो ओभरको दोस्रो बलमा कप्तान अहमद फाइज ३ रनमा रन आउट हुन पुगेपछि नेपालले दोस्रो सफलता हात पारेको थियो । दोस्रो रन लिनेक्रममा अजिज सायदसँग तालमेल गर्न नसक्दा विनोद भण्डारीको थ्रो मा करणले रन आउट गराएका थिए ।

युवा ब्याट्सम्यान विरानदीपसिंहलाई सोमपाल कामीले ६ बलमा बोल्ड आउट गरे । विरानदीपले ११ बलमा १ चौका प्रहार गरे । आठौं ओभरको पाँचौं बलमा पार्टटाइम स्पिनर दीपेन्द्रसिंह ऐरीले ओपनर सायद अजिजलाई आसिफ शेखबाट २७ रनमा क्याच आउट गराउँदै नेपाललाई चौथो सफलता दिलाए ।

अजिजले २४ बलमा ४ चौका र १ छक्का प्रहार गरे । दीपेन्द्रको टि२० आई करिअरको यो पहिलो टि२० आई विकेट समेत हो । दीपेन्द्रले ओडिआईमा भने दुई विकेट लिई सकेका छन् ।