काठमाडौं (हाम्रो खेलकुद) – नेपाली राष्ट्रिय क्रिकेट टोलीका अनुभवी स्पिनर वसन्त रेग्मी र मध्यक्रमका ब्याट्सम्यान पृथु बाँस्कोटा अमेरिकामा सम्मानित भएका छन् ।

वसन्त र पृथुलाई अमेरिका मेरिल्यान्ड राज्यले सोमबार सम्मान गरेको छ । वसन्त र पृथुलाई मेरिल्यान्ड रान्यका डिस्ट्रिक्ट–८ का डेलिगेट (नेपाली संसाद सरह) का ह्यारी भण्डारीले सम्मानित गरेका हुन् । उनीहरुलाई साथी बाल्टिमोरका उत्सव सिग्देल र रमेश भट्टको समन्वय गरेका थिए । नेपाली क्रिकेटमा पुर्याएको योगदानलाई कदर गर्दै उक्त सम्मान दिएको हो ।

वसन्त र पृथु गत चैतमा टु एक्स क्रिकेट युएसए कप प्रतियोगिता खेल्न अमेरिका गएका थिए । यी दुबै क्रिकेटर अमेरिका घरेलु क्रिकेटमा ब्यस्त हुँदै आएका छन् । अघिल्लो हप्ता अमेरिकामा सम्पन्न एलए ओपन २०२१ च्याम्पियनसिप प्रतियोगितामा वसन्त र पृथु नेपाली राइनोज अल स्टार्सबाट खेलेका थिए ।

जसक्रममा अल स्टार्स क्वाटरफाइनलबाट बाहिरिएको थियो । उक्त प्रतियोगितामा पृथुले कप्तानी गरेका थिए । पृथु समूह चरणको खेलमा प्रेरी भ्यु हरिकेन्सविरुद्ध ५६ बलमा ७ चौका र ३ छक्का सहित ७८ रनको अविजित इनिङ खेल्दै म्यान अफ द म्याच चुनिएका थिए ।

वसन्त र पृथु अमेरिका क्रिकेट बोर्डले आयोजना गर्न लागेको माइनर क्रिकेट लिग प्रतियोगिता पनि खेल्दै छन् । वसन्त हरिउड मास्टर ब्लास्टरमा अनुबन्ध भई सकेका छन् । पृथु पनि अनुबन्धको प्रकृयामा छन् । माइनर लिगमा अमेरिका २१ सहरमा २७ टोलीबीच प्रतिस्पर्धा हुने छ । जुन टि२० राष्ट्रिय प्रतियोगिता हो ।

पृथु १०१५ को स्कटल्यान्ड भ्रमणदेखि नेपाली टोलीमा छैनन् । वसन्त २०१९ को सिंगापुरमा भएको टि२० विश्वकप अन्तर्गत एसिया छनोट पछि टोलीमा छैनन् । पृथुले गत माघमा काठमाडौंमा भएको प्रधानमन्त्री कपमा बागमती प्रदेशबाट उच्च प्रदर्शन गर्दै टोलीको बन्द प्रशिक्षणमा पूनरागमन गरेका थिए । तर दुर्भाग्य कोरोना कारण सिरिज स्थगित हुन पुग्यो । गत जेठमा स्पेन भ्रमणमा बोलाएको बन्द प्रशिक्षणमा पनि पृथु थिए । तर पृथु ब्यक्तिगत कारण आउन नसक्ने जवाफ दिएका थिए । उक्त सिरिज पनि स्थगित भई सकेको छ ।