काठमाडौं (हाम्रो खेलकुद) – नेपाली राष्ट्रिय क्रिकेट टोलीका अनुभवी स्पिनर वसन्त रेग्मी पछिल्लो समय अमेरिकामा छन् । गत चैतमा वसन्त र मध्यक्रमका ब्याट्सम्यान पृथु बाँस्कोटा टु एक्स क्रिकेट युएसए कप प्रतियोगित खेल्न अमेरिका गएका थिए ।

उक्त प्रतियोगितापछि अघिल्लो साता पृथुको कप्तानीमा वसन्तले एलए ओपन च्याम्पियनसिप प्रतियोगिता नेपाली राइनोज अल स्टार्सबाट खेलेका थिए । अल स्टार्स क्वाटरफाइनलबाट बाहिरिएको थियो ।

वसन्त जुलाई ३१ देखि अमेरिकामा हुन लागेको राष्ट्रिय टि० क्रिकेट प्रतियोगिता खेल्दै छन् । वसन्त हलिवुड मास्टर ब्लास्टरमा अनुबन्ध भएका छन् । माइनर लिगमा अमेरिका २१ सहरका २७ टोलीले प्रतिस्पर्धा गर्ने छन् । कुल २ सय खेल हुने छन् । जसबाट एक राष्ट्रिय टि२० च्याम्पियन बन्ने छ ।

वसन्तले नयाँ टोलीबाट खेल्न निकै उत्साहित भएको जानकारी दिए । ‘नयाँ टिम, नयाँ खेलाडी र प्रतियागिता खेल्न उत्साहित र आतुर छु । हरेक खेलमा राम्रो प्रदर्शन गर्दै नेपालको नाम राख्न खोज्ने छु’, वसन्तले हाम्रो खेलकुदसँग कुरा गर्दै भने ।

वसन्तको टोली हलिवुडमा पूर्व नेपाली क्रिकेटर कनिष्क चौगाईंपनि छन् । कनिष्क र वसन्तले उमेर समूहसँगै खेलेका हुन् । सन् २००६ को यू१९ विश्वकपमा कजिष्को कप्तानीमा नेपालले न्युजिल्यान्डलाई १ विकेटले हराउँदै प्लेट फाइनलको उपाधि जित्दा वसन्त प्लेयर अफ द म्याच चुनिएका थिए ।

बलिउडको कप्तानी अमेरिका अलराउन्डर निसर्ग पटेलले गर्ने छन् । वसन्त नेपाल सम्झेर खेल्ने बताउँछन् । ‘मैले राम्रो प्रदर्शन गर्न सके भनें नेपालको पनि नाम आउने छ । म त्यहि सोचेर खेल्ने छु । खेलाडीको सधैं सोच देशलाई चिनाउने हुन्छ’, उनले भने ।

वसन्त २०१९ को जुलाईमा सिंगापुरमा भएको आइसिसी टि२० विश्वकप एसिया छनोटपछि राष्ट्रिय टोलीमा छैनन् । पूनरागमनको पर्खाईमा रहेका वसन्त आफू नेपाली टोली बाहिर नभएको बताउँछन् । ‘मैले पहिला पनि भनेको थिएँ म नेपाली टोली बाहिर छैन । समय दिन नपाएको कारण टोलीबाट नखेलेको मात्र हो । त्यसपछि ब्यक्तिगत र कोरोनाले पनि असर गर्यो’, उनले भने ।

‘गत वर्ष अमेरिका र ओमानविरुद्ध त्रिकोणात्मक सिरिजमा ब्यक्तिगत कारण बन्द प्रशिक्षणमा सहभागी हुन पाइनँ । त्यो समय छोरीको जन्म भएको थियो । घर परिवारलाई समय दिनुपर्यो । त्यसपछि कोरोना र लकडाउन भयो’, उनले भने ।

गत मंसिरमा क्यानले बन्द प्रशिक्षणमा बोलाएपनि कोरोना संक्रमण हुँदा वसन्त सहभागी हुन सकेनन् । फागुनमा पनि वसन्त सिनियर टोलीको बन्द प्रशिक्षणमा परेका थिए । तर दुई हप्तापछि काठमाडौं मेयर कपलाई देखाउँदै प्रशिक्षण स्थगित भएको थियो । प्रधानमन्त्री कप र काठमाडौं मेयर कप वसन्तले एपिएफबाट खेलेका थिए ।