एजेन्सी – स्पिनर तबरेज शाम्सीको घातक बलिङको सहयोगमा दक्षिण अफ्रिकाले पहिलो टि२० खेलमा आयरल्यान्डलाई ३३ रनले पराजित गरेको छ । योसँगै तीन टि२० आई खेलमा दक्षिण अफ्रिकाले १–० को अग्रता लिएको छ ।

दक्षिण अफ्रिकासँग पहिलो पटक टि२० आई खेल खेलेका आयरल्यन्डले जितको लागि १ सय ६६ रनको विजयी लक्ष्य पछ्याउने क्रममा निर्धारित २० ओभरमा ९ विकेट गुमाउँदै १ सय ३२ रन बनायो । दक्षिण अफ्रिका ह्यारी टेक्टरले ३४ बलमा ३ चौका सहित सर्वाधिक ३६ रनको योगदान दिए । ब्यारी म्याकार्थी २५ बलमा ४ चौका सहित ३० रन र जोशुवा लिटिल १५ रनमा अविजित रहे । कप्तान एन्ड्रयू बलबर्नी २० रनमा आउट हुँदा अन्यले दोहोरो अंकमा रन बनाउन सकेनन् । पल स्टर्लिङ ६ र केभिन ओ ब्रायन शून्यमा आउट भए ।

दक्षिण अफ्रिका शाम्सीले ४ ओभरमा २७ रन खर्चेर ४ विकेट लिए । लुन्गी एनगिडीले ४ ओभरमा १८ रन खर्चेर २ विकेट लिए । जर्ज लिन्डे २ र कागिसो रबाडाले एक विकेट लिए ।

त्यसअघि डुब्लिनमा टस हारेर ब्याटिङ थालेको दक्षिण अफ्रिकाले निर्धारित २० ओभरमा ७ विकेट गुमाउँदै १ सय ६५ रन बनाएको थियो । एडेन माक्ररमले ३० बलमा २ चौका र २ छक्का सहित सर्वाधिक ३९ रनको योगदान दिए । ओपनर क्विन्टन डि ककले ९ बलमा ३ चौका र १ छक्का सहित २० रन जोडे ।

कप्तान टेम्बा बभुमा १३, जान्नेमान मलान ४, रास्सी भान डर डुसेन २५, डेविड मिलर २८, रबाडा १९ र लिन्डेले १० रन बनाए । आयरल्यान्डका मार्क आदिरले ४ ओभरमा ३९ रन खर्चेर ३ विकेट लिए । सिमि सिंह र जोशुवा लिटिलले २–२ विकेट लिए । दोस्रो खेल बिहिबार हुने छ ।