एजेन्सी – बायाँ हाते विकेटकिपर ब्याट्सम्यान एलेक्स केरीले वेस्ट इन्डिजविरुद्ध पहिलो ओडिआई खेलमा कप्तानी गर्ने भएका छन् । नियमित कप्तान आरोन फिन्च चोटका कारण पहिलो खेल गुमाउने भएपछि केरीले अष्ट्रेलिया कप्तानी गर्ने भएका हुन् । केरी अष्ट्रेलिया २६ औं ओडिआई कप्तान बन्ने छन् ।

अष्ट्रेलिया र वेस्ट इन्डिजबीच तीन ओडिआई खेलको सिरिज हुँदै छ । जस अन्तर्गत पहिलो खेल आज राती हुने छ । पाँच टि२० आई सिरिज ४–१ ले गुमाएको अष्ट्रेलियालाई ओडिआई सिरिज जित्नै पर्ने दबाब छ । अघिल्लो हप्ता वेस्ट इन्डिजसँगको पाँचौं टि२० आई खेलको क्रममा फिन्चको दायाँ खुट्टाको केनमा चोट लागेको थियो । केरीले टोलीको नेतृत्व पाउँदा ठूलो सम्मान पाएको महसुस गरेको बताएका छन् ।

‘कप्तान अष्ट्रेलिया खेलमा सबैभन्दा ठूलो सुविधा हो र यो सम्मान पाएकोमा म अत्यन्त आभारी छु। फिन्च हाम्रो कप्तान हुन् र हामी फिट हुँदा उनलाई खुला हातले स्वागत गर्नेछौं । यसैले अब मलाई आशा छ कि म कप्तानी सक्दछु’, केरीले कप्तानी भूमिका पाएपछि भनेका छन् । पहिलो खेलमा वेस्ट इन्डिजविरुद्ध ओपनर जोश फिलिपे, बेन म्याडेरमोट र तीव्र गतिका बलर राइली मेरिडिथले ओडिआईमा डेब्यू गर्ने सम्भावना छ ।

केरीले क्रिकेटमा पहिलो पटक कप्तानी गर्न लागेका हुन् । प्रतिभाशाली केरी पूर्व फुटबल खेलाडी पनि हुन् । उनले उमेर समूहमा फुटबलमा भने कप्तानी गरेका थिए । २०१८ मा डेब्यू गरेका केरीले ४२ ओडिआई र ३३ अन्तर्राष्ट्रिय खेल खेलेका छन् । २०१९ को विश्वकपमा बायाँ हाते विकेटकिपर ब्याट्सम्यान केरीले उत्कृष्ट प्रदर्शन गरेका थिए ।

ओडिआईमा उत्कृष्ट प्रदर्शन र नेतृत्व गर्न सके केरीलाई टेस्टमा कप्तानीको पनि बाटो खुल्ने छ । टेस्ट कप्तान टिम पेइनको कप्तानी आलोचना हुँदै आएको छ । तर स्टिभ स्मिथ, डेविड वार्नर, मार्कस स्टोइनिस र प्याट कमिन्स जस्ता प्रमुख खेलाडी वेस्ट इन्डिज भ्रमणमा नहुँदा केरीलाई सहज भने हुने छैन ।