एजेन्सी – पाकिस्तान र इंग्ल्यान्डबीचको तेस्रो तथा निर्णायक टि२० आई खेल आज राती हुँदै छ । खेल नेपाली समय अनुसार राती ११ः १५ मा म्यानचेस्टरमा सुरु हुने छ । तीन टि२० आई सिरिज दुई खेल सकिँदा १–१ को बराबरीमा छ ।

तेस्रो खेल जित्ने टोलीले सिरिज पनि जित्ने छ । दुबै टोली अन्तिम खेलमा जितका साथ सिरिज जित्न चाहन्छन् । पहिलो खेलमा पाकिस्तान ३१ रनले विजयी हुँदा दोस्रो खेलमा ४५ पराजित भएको थियो । पहिलो २ सय ३२ रन बनाउँदै आफ्नो टि२० आईको सर्वाधिक रन बनाएको पाकिस्तानले दोस्रो खेलमा भने कमजोर ब्याटिङ गरेको थियो ।

पहिलो खेलमा कप्तान बाबर आजमले ८५ र मोहम्मद रिजवानले ६३ रन बनाएका थिए । पहिलो विकेटका लागि १ सय ५० रनको साझेदारी गरेका थिए । दोस्रो खेलमा यी दुई ब्याट्सम्यान सस्तैमा आउट भएका थिए । यी दुई ब्याट्सम्यानमा पाकिस्तान धेरैमा निर्भर छ । तेस्रो खेलमा बाबर र रिजवानको प्रदर्शन निकै महत्वपूर्ण हुने छ ।

मध्यक्रमका फखर जमान, शोहिब मकसुद र मोहम्मद हफिजलाई उत्कृष्ट प्रदर्शन गर्नुपर्ने हुन्छ । आजम खानलाई निरन्तरता दिने सम्भावना छ । दोस्रो खेलमा युवा ब्याट्सम्यान आजम खान एक रनमा आउट भएका थिए । आजमले घरेलु क्रिकेटमा आक्रामक ब्याट्सम्यानको छवि बनाएका छन् । उनको शारीरिक बनाबटले पनि ठूला सटको लागि सहज बनाउछ । पाकिस्तानले बलिङमा भने परिवर्तन गर्न सक्छ । दोस्रो खेलमा ४ ओभरमा ४८ रन खर्चेका हरिस रौफको स्थानमा स्पिनर उस्मान कादिरलाई मौका दिन सक्ने सम्भावना रहन्छ । हसन अली फिट भएको अवस्थामा मोहम्मद हसनैनलाई बेन्चमा राख्न सक्छ ।

पहिलो खेलमा पराजित भएपनि लियाम लिभिङस्टोनले शतक प्रहार गरेका थिए । दोस्रो खेलमा पनि लियामले आक्रामक ३८ रन जोडेका थिए । दोस्रो खेलमा कप्तान जस बटलर र मोईन अलीले आक्रामक रुपमा रन जोडेका थिए । यी दुई ब्याट्सम्यानलाई रोक्न कठिन पर्न सक्छ । दोस्रो खेलमा कप्तान ओईन मोर्गनलाई विश्राम दिएको थियो ।

दोस्रो खेलमा एक रनमा आउट भएका डेविड मलान वा जोनी बेयरस्टोको स्थानमा मोर्गन टोलीमा फर्किन सक्छन् । इंग्ल्यान्डले बलिङमा भने परिवर्तनको सम्भावना कम छ । स्पिनरमा म्याट पार्किसन र आदिल राशिद तथा तीव्र गतिका बलरमा सकिब मोहम्मद, क्रिस जोर्डन र टम करनलाई निरन्तरता दिने सम्भावना देखिन्छ ।