एजेन्सी – कप्तान तमिम इकबालको शतकको सहयोगमा बंगलादेशले घरेलु टोली जिम्बावेविरुद्ध तीन ओडिआई खेलको सिरिजमा क्लिनस्विप गरेको छ । तेस्रो तथा अन्तिम खेलमा जिम्बावेलाई ५ विकेटले पराजित गर्दै बंगलादेशले क्लिनस्विप गरेको हो ।

जितको लागि २ सय ९९ रनको विजयी लक्ष्य पछ्याएको बंगलादेशले ४८ ओभरमा ५ विकेट गुमाउँदै पूरा गर्यो । बंगलादेशका कप्तान तमिम इकबालले ९७ बलमा ८ चौका र ३ छक्का सहित १ सय १२ रनको शतकीय इनिङ खेले । तमिमले ८७ बलमा आफ्नो ओडिआई करिअरको १४ औं शतक पूरा गरेका थिए । विकेटकिपर नुरुल हसन ३९ बलमा ६ चौका सहित ४५ रनमा अविजित रहे ।

अफिफ हुसैन १७ बलमा ३ चौका र १ छक्का सहित २६ रनमा अविजित रहे । सकिब अल हसन र मोहम्मद मिथुन ३०–३० रनमा आउट भए । ओपनर लिटन दास ३२ रनमा आउट भएका थिए । जिम्बावेका डोनाल्ड तिरिपानो र वेस्ले मेधभरेले २–२ विकेट लिए ।

त्यसअघि हरारे स्पोर्ट्स क्लबमा टस हारेर ब्याटिङ थालेको जिम्बावे ४९।३ ओभरमा २ सय ९८ रनमा अल आउट भएको थियो । जिम्बावेका रेजिस चकब्भाले ९१ बलमा ७ चौका र १ छक्का सहित सर्वाधिक ८४ रनको योगदान दिए । तल्लोक्रममा ब्याटिङ गर्ने चकब्भाले तेस्रो खेलमा ओपनिङ गर्दै राम्रो सुरुवात दिलाएका थिए ।

छैटौं विकेटका लागि रयान बर्ल र सिकन्दर राजाले ८० बलमा १ सय १२ रनको उत्कृष्ट शतकीय साझेदारी गर्दै बलियो योगफलमा पुर्याएका हुन् । राजा ५४ बलमा ७ चौका र १ छक्का सहित ५७ रनमा क्याच आउट भए । आक्रामक ब्याटिङ गरेका रयान बर्लले ४३ बलमा ४ चौका र ४ छक्का सहित ५९ रनको उत्कृष्ट इनिङ खेले । युवा ब्याट्सम्यान डियोन मायर्स ३८ बलमा ४ चौका सहित ३४ रनमा आउट भए । मायर्स र चकब्भाले ७० बलमा ७१ रनको साझेदारी गरेका थिए । कप्तान ब्रेन्डन टेलर ३९ बलमा ३ चौका सहित २८ रनमा आउट भए ।

बंगलादेशका मुस्ताफिजुर रहमान र मोहम्मद सैफिुद्दिनले ३–३ विकेट लिए । मोहमुदूल्लाह रियादले २, तस्किन अहमद र सकिब अल हसनले एक एक विकेट लिए । पहिलो खेलमा बंगलादेश १ सय ५५ रन र दोस्रो खेलमा ३ विकेटले विजयी भएको थियो । सकिब खेलको प्लेयर अफ द सिरिज चुनिए । जिम्बावे र बंगलादेशबीच थप तीन टि२० आई खेल हुने छ । पहिलो खेल विहिबार हुने छ ।