एजेन्सी – तीव्र गतिका बलर दीपक चाहरले उत्कृष्ट ब्याटिङ गरेपछि भारतले दोस्रो ओडिआई खेलमा श्रीलंकामाथि ३ विकेटको रोमान्चक जित हात पारेको छ । योसँगै तीन ओडिआई खेलको सिरिज भारतले एक खेल अगावै जितेको छ ।

जितको लागि २ सय ७६ रनको विजयी लक्ष्य पछ्याएको भारत ४९.१ ओभरमा ७ विकेट गुमाउँदै पूरा गर्यो । एक समय हार नजिक पुगेको भारतलाई दीपक चाहरले तल्लोक्रममा ८२ बलमा ७ चौका र १ छक्का सहित सर्वाधिक ६९ रनमा अविजित रहँदै जित पक्का गराए । भुवनेश्वर कुमार २८ बलमा २ चौका सहित १९ रनमा अविजित रहे ।

आठौं विकेटका लागि दीपक र भुवनेश्वर कुमारले ८४ रनको उत्कृष्ट साझेदारी गरेपछि भारतले रोमान्चक जित हात पारेको हो । अन्तिम १२ बलमा भारतलाई १५ रन चाहिँएको थियो । ४९ औं ओभरमा दुश्मन्था चामिराले दुई चौका सहित १२ रन खर्चेपछि श्रीलंका जितको सम्भावना सकिएको थियो । अन्तिम ओभरमा तीन रन चाहिँएको अवस्थामा दीपकले पहिलो बलमा चौका प्रहार गर्दै जित पक्का गराए ।

सूर्यकुमार यादवले ४४ बलमा ६ चौका सहित ५३ रनको योगदान दिए । ओपनर पृथ्वी शालाई तेस्रो ओभरको अन्तिम बलमा स्पिनर वानिन्दु हसरंगाले १३ रनमा बोल्ड आउट गर्दै पहिलो सफलता दिलाएका थिए । आक्रामक ब्याटिङका साथ दबाबमा राख्ने प्रयास गरेका शा दोस्रो खेलमा भने असफल हुन पुगे । उनले ११ बलमा ३ चौका प्रहार गरे । तीव्र गतिका बलर कसुन रजिथले पाँचौं ओभरको अन्तिम बलमा ईशान किशनलाई एक रनमा बोल्ड आउट गर्दै घरेलु टोली श्रीलंकालाई सानदार सुरुवात दिलाएका थिए ।

१२ औं ओभरको अन्तिम बलमा कप्तान शिखर धवनलाई वानिन्दुले २९ रनमा एलबिडब्लू आउट गर्दै श्रीलंकालाई महत्वपूर्ण सफलता दिलाए । शिखरले ३८ बलमा ६ चौका प्रहार गरे । मनिष पाण्डे ३७ रनमा रन आउट हुँदा भारतलाई अर्को झट्का लागेको थियो । मनिषले ३१ बलमा ३ चौका प्रहार गरे । कप्तान दासुन शनाकाले हार्दिक पान्ड्यालाई धनन्जय डि सिल्भाबाट शून्यमा क्याच गराउँदै जितको सम्भावना देखाएका थिए । २७ औं ओभरको अन्तिम बलमा लक्शान सन्दाकानले सूर्यलाई एलबिडब्लू आउट भएपछि श्रीलंका जितको सम्भावना उच्च भएको थियो ।

तर तल्लोक्रममा क्रुनाल पान्ड्या क्रिजमा रहँदै भारतलाई जितको आशा दिलाई रहेका थिए । तर वानिन्दु हसरंगाले क्रुनाललाई ३५ रनमा बोल्ड गरे । क्रुनालले ५४ बलमा ३ चौका प्रहार गरे । क्रुनाल आउट भएपछि श्रीलंका एकसमय जिततर्फ अघि बढेको थियो । तर तीव्र गतिका बलर दीपक चाहरले उत्कृष्ट ब्याटिङका साथ आफ्नो ओडिआई करिअरको पहिलो अर्धशतक प्रहार गर्दै टोलीको जित पक्का गराए । दीपकले ६४ बलमा अर्धशतक प्रहार गरेका थिए ।

श्रीलंका वानिन्दु हसरंगाले १० ओभरमा ३७ रन खर्चेर ३ विकेट लिए । कसुन रजिथ, लक्शान सन्दाकान र दासुन शनाकाले एक एक विकेट लिए ।

त्यसअघि आर प्रेमाडासा स्टेडियम कोलोम्बोमा टस जितेर पहिला ब्याटिङ रोजेको घरेलु टोली श्रीलंकाले निर्धारित ५० ओभरमा ९ विकेट गुमाउँदै २ सय ७५ रन बनाएको थियो । श्रीलंका ओपनर अविष्का फ्रेनान्डो र मध्यक्रमका चरिथ असालान्काले अर्धशतकयी इनिङ खेले । चरिथ असालान्काले ६८ बलमा ६ चौका सहित सर्वाधिक ६५ रनको योगदान दिए ।

असालान्काले आफ्नो ओडिआई करिअरको पहिलो अर्धशतक ५६ बलमा पूरा गरेका थिए । ओपनर अविष्का फ्रेनान्डोले ७१ बलमा ४ चौका र १ छक्का सहित ५० रनको योगदान दिए । अविष्का यो ओडिआई करिअरको चौथो अर्धशतक हो । तल्लोक्रमका ब्याट्सम्यान चामिका करुणारत्नेले ३३ बलमा ५ चौका सहित ४४ रनमा अविजित रहे । अन्य ब्याट्सम्यानले ठूलो इनिङ खेल्न सकेनन् ।

श्रीलंकालाई ओपनर अविष्का फ्रेनान्डो र विकेटकिपर मिनोद भानुकाले १३.२ ओभरमा ७७ रनको साझेदारी गर्दै राम्रो सुरुवात दिलाएका थिए । १४ औं ओभरको दोस्रो बलमा स्पिनर युजभेन्द्र चहलले मिनोदलाई मिडविकेटमा मनिष पाण्डेबाट ३६ रनमा क्याच गराउँदै पहिलो विकेटको साझेदारी तोडेका थिए । मिनोदले ४२ बलमा ६ चौका प्रहार गरे ।

लगत्तै अर्को बलमा भानुका राजपक्षे विकेटकिपर ईशान किशनबाट शून्यमा क्याच आउट हुन पुगे । लगातार दुई विकेट गुमाएको श्रीलंकालाई तेस्रो विकेटका लागि फ्रेनान्डो र धनन्जय डि सिल्भाले ४७ रनको साझेदारी गर्दै इनिङ उकासेका थिए । राम्रो सुरुवात गरेपनि लगातार दुई विकेट गुमाउँदा श्रीलंका केहि दबाबमा परेको थियो ।

तीव्र गतिका बलर भुवनेश्वर कुमारको २५ औं ओभरको अन्तिम बलमा फ्रेनान्डो क्रुनाल पान्ड्याबाट क्याच आउट हुन पुगे । २८ औं ओभरको दोस्रो बलमा धनन्जयलाई चहलले ३२ रनमा बोल्ड आउट गरे । धनन्जयले ४५ बलमा १ चौका प्रहार गरे । दीपक चाहरले दासुन शनाकालाई ८ रनमा बोल्ड आउट गरेका थिए । दुश्मन्था चामिरा २ रनमा आउट भए ।

भारतका स्पिनर युजभेन्द्र चहलले १० ओभरमा १ मेडन सहित ५० रन खर्चेर ३ विकेट लिए । दीपक चाहरले ८ ओभरमा ५३ रन खर्चेर २ विकेट लिए । भुवनेश्वर कुमारले १० ओभरमा ५४ रन खर्चेर ३ विकेट लिए । पहिलो खेलमा भारत ७ विकेटले विजयी भएको थियो । तेस्रो खेल शुक्रबार हुने छ ।