एजेन्सी – घरेलु टोली इंग्ल्यान्डले पाकिस्तानविरुद्ध तीन टि२० आई खेलको सिरिज २–१ ले जितेको छ । निर्णायक तेस्रो टि२० आई खेलमा इंग्ल्यान्डले पाकिस्तानलाई ३ विकेटले पराजित गर्दै सिरिज उपाधि जितेको हो ।

जितको लागि १ सय ५५ रनको विजयी लक्ष्य पछ्याएको इंग्ल्यान्डले १९.४ ओभरमा ७ विकेटको क्षतिमा पूरा गर्यो । इंग्ल्यान्डका ओपनर जेसन रोयले ३६ बलमा १२ चौका र १ छक्का सहित सर्वाधिक ६४ रनको योगदान दिए । जस बटलर २१, डेविड मलान ३१, जोनी बेयरस्टो ५, मोईन अली एक, कप्तान ओईन मोर्गन २१ रनमा आउट भए । लियाम लिभिङस्टोन ६ रनमा आउट भए ।

पाकिस्तानका स्पिनर मोहम्मद हफिजले ४ ओभरमा २८ रन खर्चेर ३ विकेट लिए । ईमाद वासिम, हसन अली, उस्मान कादिर र शादब खानले एक एक विकेट लिए ।

त्यसअघि म्यानचेस्टरमा टस जितेर पहिला ब्याटिङ रोजेको पाकिस्तानले निर्धारित २० ओभरमा ६ विकेट गुमाउँदै १ सय ५४ रन बनाएको थियो । पाकिस्तानका ओपनर मोहम्मद रिजवानले ५७ बलमा ५ चौका र ३ छक्का सहित सर्वाधिक ७६ रनमा अविजित रहे । फखर जमान २४, बाबर आजम ११, शोहिब मकसुद १३ र हसन अलीले १५ रन बनाए । इंग्ल्यान्डका स्पिनर आदिल राशिदले ४ ओभरमा ३५ रन खर्चेर ४ विकेट लिए । राशिदको यो टि२० आई करिअरको उत्कृष्ट प्रदर्शन हो । मोईन अलीले एक विकेट लिए ।

पहिलो खेलमा सानदार शतक प्रहार गरेका इंग्ल्यन्डका लियाम लिभिङस्टोन प्लेयर अफ द सिरिज चुनिए । जेसन रोय प्लेयर अफ द म्याच चुनिए । पाकिस्तान पहिलो टि२० खेलमा ३१ रनले विजयी हुँदा दोस्रो खेलमा ४५ रनले पराजित भएको थियो । इंग्ल्यान्डसँगको तीन ओडिआई सिरिजमा पाकिस्तानले क्लिनस्विप को हार बेहोरेको थियो ।

अव पाकिस्तानले वेस्टइन्डिजसँग पाँच टि२० आई सिरिज खेल्ने छ । पहिलो टि२० आगमी मंगलबार हुने छ । इंग्ल्यान्डले भारतसँग पाँच टेस्टको सिरिज खेल्ने छ । पहिलो टेस्ट अगष्ट चारमा सुरु हुने छ ।