एजेन्सी – बंगलादेशले पहिलो टि२० खेलमा घरेलु टोली जिम्बावेमाथि ८ विकेटको सहज जित निकालेको छ । बिहिबार साँझ सम्पन्न खेलमा सहज जितका साथ भ्रमण टोली बंगलादेशले तीन टि२० आई सिरिजमा १–० को अग्रता लिएको छ ।

जितको लागि १ सय ५३ रनको विजयी लक्ष्य पछ्याएको बंगलादेशले १८.५ ओभरमा २ विकेटको क्षतिमा पूरा गर्यो । बंगलादेशका ओपनर मोहम्मद नईम ५१ बलमा ६ चौका सहित ६३ रनमा अविजित रहे । सौम्य सरकार ४५ बलमा ४ चौका र २ छक्का सहित ५० रनमा रन आउट भए ।

पहिलो विकेटका नईम र सरकारले १३.१ ओभरमा १ सय २ रनको शतकीय साझेदारी गर्दै जित सहज बनाएका थिए । कप्तान महमुदूल्लाह रियाद १५ रनमा रन आउट हुँदा नुरुल हसन ८ बलमा १ चौका र १ छक्का सहित १६ रनमा अविजित रहे । जिम्बावेका कुनै पनि बलरले विकेट लिन सकेनन् । बंगलादेशका दुबै ब्याट्सम्यान रन आउट भएका थिए ।

त्यसअघि हरारे स्पोर्ट्स क्लबमा जिम्बावेले टस जितेर पहिला ब्याटिङ गर्दै १९ ओभरमा १ सय ५२ रनमा अल आउट भएको थियो । एक समय राम्रो अवस्थामा रहेपनि जिम्बावेले अन्तिम १२ बलमा १६ रन जोड्न ४ विकेट गुमाएपछि मध्यम योगफलमै समेटिएको थियो । जिम्बावेका विकेटकिपर रेजिस चकब्भा २२ बलमा ५ चौका र २ छक्का सहित सर्वाधिक ४३ रनको योगदान दिए ।

डियोन मायर्सले २२ बलमा २ चौका सहित ३५ रनको योगदान दिए । वेस्ले मेधभरेले २३, कप्तान सिकन्दर राजा शून्य ल्यूक जोंग १८ रनको योगदान दिए । बंगलादेशका तीव्र गतिका बलर मुस्ताफिजुर रहमानले ४ ओभरमा ३१ रन खर्चेर ३ विकेट लिए । मोहम्मद सैफुद्दिन र शोरिफुल ईस्लामले २–२ विकेट लिए । सकिब अल हसन र सौम्य सरकारले एक एक विकेट लिए । दोस्रो खेल शुक्रबार हुने छ ।