एजेन्सी – बिहिबार राती देखि सुरु भएको द हन्ड्रेड प्रतियोगितामा ओभल ईन्भिन्सिबल्सले म्यानचेस्टर ओरिजिनल्सलाई ९ रनले पराजित गर्दै विजयी सुरुवात गरेको छ ।

क्रिकेट इतिहासमा पहिलो पटक इंग्ल्यान्ड र वेल्स क्रिकेट बोर्डको आयोजनामा सुरु भएको द हन्ड्रेड प्रतियोगिता उद्धघाटन खेलमा ओभल ईन्भिन्सिबल्सले विजयी सुरुवात गरेको हो ।

जितको लागि १ सय ४६ रनको विजयी लक्ष्य पछ्याएको म्यानचेस्टरले निर्धारित एक सय बलमा ७ विकेटको क्षतिमा १ सय ३६ रन बनायो । म्यानचेस्टरका कार्लोस ब्रेथवेटले २९ बलमा २ चौका र १ छक्का सहित सर्वाधिक ३७ रनको योगदान दिए । जो क्लार्क १५, कोलिन मुनरो २६ र क्याल्विन ह्यारिसन २३ रन बनाए । कप्तान जस बटलर ८ रनमा क्याच आउट भएका थिए ।

ओभलका युवा अलराउन्डर साम करनले २० बलमा २७ रन खर्चेर २ विकेट लिए । नाथन सोउटरले १५ बलमा १८ रन खर्चेर २ विकेट लिए । टम करन, रोस टोपली र सुनिल नारायणको नाममा एक एक विकेट रह्यो ।

त्यसअघि लन्डनमा टस हारेर ब्याटिङको निम्तो पाएको ओभलले निर्धारित एक सय बलमा ८ विकेटको क्षतिमा १ सय ४५ रन बनाएको थियो । कप्तान तथा विकेटकिपर साम बिलिंग्सले ३० बलमा ४ चौका र २ छक्का सहित सर्वाधिक ४९ रनको योगदान दिए । बिलिंग्सनै खेलको प्लेयर अफ द म्याच चुनिए । टम करन १८ बलमा ३ चौका र १ छक्का सहित २९ रनमा अविजित रहे ।

कोलिन इनग्राम १७, विल ज्याक्स १५ र जेसन रोय २० रनमा आउट भए । म्यानचेस्टरका तीव्र गतिका बलर फर्द क्लासेनले १५ बलमा २३ रन खर्चेर ३ विकेट लिए । टम हार्टले र स्टिभन फिनले २–२ विकेट लिए । दोस्रो खेलमा आज राती दोस्रो खेलमा बर्मीङ्घम फिनिक्स र लन्डन स्प्रिरिटबीच प्रतिस्पर्धा हुने छ । नेपाल लेग स्पिनर सन्दीप लामिछाने ओभलमा अनुबन्ध भएपनि भिसाको कारण इंग्ल्यान्डमा १० दिन क्वारेनटाइन बसेपछि बिहिबार स्वदेश फर्कि सकेका छन् ।