एजेन्सी – भारतले तेस्रो ओडिआई खेलमा श्रीलंकाविरुद्ध विकेटकिपर ब्याट्सम्यान सञ्जु स्यामसन सहित पाँच खेलाडीलाई डेब्यू दिएको छ । आर प्रेमाडासा स्टेडिम कोलोम्बोमा भारतका कप्तान शिखर धवनले टस जितेर पहिला ब्याटिङ गर्ने निर्णय लिँदै टोलीमा ६ परिवर्तन गरेका छन् ।

तीन ओडिआईमा सुरुवाती दुई खेल जित्दै भारतले एक खेल अगावै सिरिज जिति सकेको छ । जसको कारण पाँच खेलाडीलाई डेब्यू दिएको हो । भारतले स्यामसन सहित ब्याट्सम्यान नितिश राणा, तीव्र गतिका बलर चेतन सकारिया, अलराउन्डर कृष्णप्पा गौवथम र राहुल चाहरलाई डेब्यू गराएको छ । राजस्थान रोयल्सका विकेटकिपर ब्याट्सम्यान सन्जु स्यामसनले इन्डियन प्रिमियर लिग (आइपिएल) मा लगातार उत्कृष्ट प्रदर्शन गदैै आएका छन् । स्यामसनले टि२० आई भने भारतबाट खेलि सकेका छन् ।

युवा तीव्र गतिका बलर चेतनले यस सिजनमा डेब्यू आइपिएल खेल्दै राम्रो प्रभाव छाडेपछि भारतीय टोलीमा स्थान बनाएका थिए । नितिश राणाले कोलकाता नाइट राइडर्सबाट आइपिएल खेल्दै मध्यक्रममा लगातार राम्रो प्रदर्शन गर्दै आएका छन् । मुम्बई इन्डियन्सका राहुल चहरले टि२० आई खेलि सकेका छन् । स्पिन अलराउन्डर कृष्णप्पाले आइपिएलमा राम्रो छाप छोड्दै आएका छन् ।

त्यस्तै भारतले तीव्र गतिका बलर नवदीप सैनीलाई पनि मौका दिएको छ । सैनीलाई दीपक चाहरको स्थानमा मौका दिएको हो । दोस्रो खेलबाट ईशान किशन, क्रुनाल पान्ड्या, भुवनेश्वर कुमार, कुलदीप यादव, युजभेन्द्र चहल र दीपक चाहरलाई भारतले विश्राम दिएको छ ।

श्रीलंकाले टोलीमा तीन परिवर्तन गरेको छ । प्रविन जयव्रिकमे, अकिला धनन्जय, रमेश मेन्डिस टोलीमा फर्किएका छन् । वानिन्दु हसरंगा, लक्शान सन्दाकन र कसुन रजिथ बेन्चमा छन् । भारत पहिलो खेलमा ७ विकेट र दोस्रो खेलमा ३ विकेटले विजयी भएको थियो ।

श्रीलंका प्लेइङ ११ : अविष्का फ्रेनान्डो, मिनोद भानुका (विकेटकिपर), भानुका राजपक्षे, धनन्जय डि सिल्भा, चरिथ असालन्का, दासुन शनाका (कप्तान), रमेश मेन्डिस, चामिका करुणारत्ने, अकिला धनन्जय, दुश्मन्था चामिरा र प्रविन जयव्रिकमले ।

भारतको प्लेइङ ११ : पृथ्वी शा, शिखर धवन (कप्तान), सन्जु स्यामसन (विकेटकिपर), मनिष पाण्डे, सूर्यकुमार यादव, नितिश राणा, हार्दिक पान्ड्या, कृष्णप्पा गौवथम, राहुल चाहर, नवदीप सैनी र चेतन सकारिया ।