एजेन्सी – जिम्बावेले दोस्रो टि२० खेलमा बंगलादेशलाई २३ रनले पराजित गरेको छ । यो जितसँगै घरेलु टोली जिम्बावेले तीन टि२० आई खेलको सिरिज १–१ को बराबरीमा पुर्याएको छ ।

जितको लागि १ सय ६७ रनको विजयी लक्ष्य पछ्याएको बंगलादेश १९.५ ओभरमा १ सय ४३ रनमा अल आउट भयो । बंगलादेशका लागि डेब्यू खेल खेलेका समिम हसनैनले १३ बलमा ३ चौका र २ छक्का सहित सर्वाधिक २९ रनको योगदान दिए । अफिफ हुसैन २४, माहेदी हसन १५, सकिब अल हसन १२ र मोहम्मद सैफिद्दिनले १९ रनको योगदान दिए । अन्य ब्याट्सम्यानले भने राम्रो प्रदर्शन गर्न सकेनन् ।

जिम्बावेका स्पिनर वेलिंग्टन मसाकाड्जाले ४ ओभरमा २० रन खर्चेर ३ विकेट लिए । तीव्र गतिका बलर ब्लेसिङ मुर्जाबानीले ४ ओभरमा २१ रन खर्चेर २ विकेट लिए । ल्यूक जोंगवे ३.५ ओभरमा ३१ रन खर्चेर ३ विकेट लिए । टेन्डाई चतरा नाममा २ विकेट रह्यो ।

त्यसअघि हरारे स्पोर्ट्स क्लबमा टस जितेर पहिला ब्याटिङ रोजेको जिम्बावेले निर्धारित २० ओभरमा ६ विकेट गुमाउँदै १ सय ६६ रन बनाएको थियो । जिम्बावेका युवा ब्याट्सम्यान वेस्ले मधेभरेले ५७ बलमा ५ चौका र ३ छक्का सहित सर्वाधिक ७३ रनको योगदान दिए । तल्लोक्रममा रयान बर्ल १९ बलमा २ चौका र २ छक्का सहित ३४ रनमा अविजित रहे । डियोन मायर्स २६ र रेजिस चकब्भा १४ रनमा आउट भए ।

बंगलादेशका शोरिफुल ईस्लामले ४ ओभरमा ३३ रन खर्चेर ३ विकेट लिए । सकिब अल हसन र माहेदी हसनले एक एक विकेट लिए । पहिलो खेलमा बंगलादेश ८ विकेटले विजयी भएको थियो । तेस्रो तथा निर्णायक खेल आइतबार हुने छ ।