एजेन्सी – श्रीलंकाले तेस्रो तथा अन्तिम ओडिआई खेलमा भारतलाई डकवर्थ लेविस पद्धतिको आधारमा ३ विकेटले पराजित गरेको छ । यो सँगै श्रीलंकाले तीन ओडिआई खेलको सिरिज २–१ ले गुमाएको छ । श्रीलंकाले घरेलु मैदानमा भारतसँग लगातार १० ओडिआई खेलको हार यो जितसँगै अन्त्य गरेको छ ।

जितको लागि २ सय २७ रनको विजयी लक्ष्य पछ्याएको श्रीलंकाले ३९ ओभरमा ७ विकेटको क्षतिमा पूरा गर्यो । श्रीलंका जितमा ओपनर अविष्का फ्रेनान्डोले ९८ बलमा ४ चौका र १ छक्का सहित सर्वाधिक ७६ रनको योगदान दिँदै टोलीको जित पक्का गरे । अविष्का खेलको प्लेयर अफ द म्याच चुनिए । शीर्षक्रमका ब्याट्सम्यान भानुका राजपक्षेले ५६ बलमा १२ चौका सहित ६५ रनमा क्याच आउट भए । दोस्रो विकेटका लागि भानुका राजपक्षे र अविष्का फ्रेनान्डोले १ सय ९ रनको उत्कृष्ट शतकीय साझेदारी जित नजिक पुर्याएका थिए ।

चरिथ असालन्का २४, मिनोद भानुका ७, धनन्जय डि सिल्भा २, कप्तान दासुन शनाका शून्य रनमा आउट हुँदा रमेश मेन्डिस १५ रनमा अविजित रहे । भारतका डेब्यू खेल खेलेका स्पिनर राहुल चाहरले १० ओभरमा ५४ रन खर्चेर ३ विकेट लिए । त्यस्तै डेब्यू खेल खेलका तीव्र गतिका बलर चेतन सकारियाले ८ ओभरमा ३४ रन खर्चेर २ विकेट लिए । स्पिनर कृष्णप्पा गौवथम र हार्दिक पान्ड्या नाममा एक एक विकेट रह्यो ।

त्यसअघि आर प्रेमाडासा स्टेडियम कोलोम्बोमा टस जितेर पहिला ब्याटिङ रोजेको भारत ४३।१ ओभरमा २ सय २५ रनमा अल आउट भएको थियो। वर्षाको कारण खेल केहि समय रोकिँदा ४७ ओभरमा झारिएको थियो ।भारतका ओपनर पृथ्वी शाले ४९ बलमा ८ चौका सहित सर्वाधिक ४९ रनको योगदान दिए ।

भारतलाई पहिलो विकेटका लागि ओपनर शिखर धवन र पृथ्वी शाले २।३ ओभरमा २८ रनको साझेदारी गरेका थिए । धवनलाई तीव्र गतिका बलर दुुश्मन्था चामिराले १३ रनमा विकेटकिपर भानुका राजपक्षेबाट क्याच गराउँदै श्रीलंकालाई पहिलो सफलता दिलाए । धवनले ११ बलमा ३ चौका प्रहार गरे ।

दोस्रो विकेटका लागि पृथ्वी र सन्जु स्यामसनले ७४ रनको साझेदारी गर्दै राम्रो सुरुवात दिलाएका थिए । १५ औं ओभरको पाँचौ बलमा कप्तान दासुन शनाकाले पृथ्वीलाई एलबिडब्लू आउट गर्दै दोस्रो सफलता दिलाएका थिए । १९ औं ओभरको चौथो बलमा स्यामसन प्रविन जयविक्रमकको बलमा अविष्का फ्रेन्नान्डोबाट ४६ रनमा क्याच आउट हुन पुगे । ओडिआईमा डेब्यू खेल खेलेका स्यामसनले ४६ बलमा ५ चौका र १ छक्का प्रहार गरे ।

जयव्रिकमले मनिष पाण्डेलाई ११ रनमा क्याच आउट गराए । जयविक्रमलेनै २९ औं ओभरको तेस्रो बलमा हार्दिक पान्ड्यालाई १९ रनमा एलबिडब्लू आउट गरेपछि भारत दबाबमा परेको थियो । स्पिनर अकिला धनन्जयले सूयकुमार यादवलाई ४० रनमा एलबिडब्लू आउट गर्दै श्रीलंकालाई महत्वपूर्ण सफलता दिलाएका थिए । सूर्यले ३७ बलमा ७ चौका प्रहार गरे । धनन्जयले डेब्यू खेल खेलेका नितिश राणालाई ७ र कृष्णप्पा गौवथमलाई २ रनमा एबिडब्लू आउट गरे ।

तल्लोक्रमका राहुल चाहर १३ र नवदीप सैनी १५ रनमा आउट भए । एक समय भारत २४।४ ओभरमा १५७–३ को बलियो अवस्थामा हुँदा विशाल योगफलको सम्भावना देखाएको थियो । तर मनिष पाण्डे आउट भएसँगै भारतका तल्लोक्रमका ब्याट्सम्यान लगातार आउट हुन पुगेका थिए । श्रीलंकाले राम्रो पूनरागमनका साथ मध्यम लक्ष्य पाएको छ ।

श्रीलंका अकिला धनन्जयले १० ओभरमा ४४ रन खर्चेर ३ विकेट लिए । प्रविन जयविक्रमले १० ओभरमा ५९ रन खर्चेर ३ विकेट लिए । दुश्मन्था चामिराले ८।१ ओभरमा ५५ रन खर्चेर २ विकेट लिए । दासुन शनाका र चामिका करुणारत्नेले एक एक विकेट लिए । पहिलो खेलमा भारत ७ विकेट र दोस्रो खेलमा ३ विकेटले विजयी भएको थियो । भारत र श्रीलंकाबीच थप तीन टि२० आई खेल हुने छ । पहिलो खेल आइतबार हुने छ ।