एजेन्सी – तीव्र गतिका बलर भुवनेश्वर कुमार चम्कँदा भारतले पहिलो टि२० खेलमा घरेलु टोली श्रीलंकालाई ३८ रनले पराजित गरेको छ । योसँगै तीन टि२० आई सिरिजमा भारतले १–० को अग्रता लिएको छ ।

जितको लागि १ सय ६५ रनको विजयी लक्ष्य पछ्याएको श्रीलंका १८.३ ओभरमा १ सय २६ रनमा अल आउट भयो । श्रीलंकाले अन्तिम १६ रन जोड्न ६ विकेट गुमाएपछि पराजित हुन पुगेको हो । श्रीलंका चरिथ असालान्काले २६ बलमा ३ चौका र ३ छक्का सहित सर्वाधिक ४४ रनको योगदान दिए । ओपनर अविष्का फ्रेनान्डोले २३ बलमा ३ चौका सहित २६ रन बनाए । मिनोद भानुका १०, धनन्जय डि सिल्भा र एशेन बन्डारा ९–९ रनमा आउट भए । कप्तान दासुन शनाका १६ रनमा आउट भए । अन्य ब्याट्सम्यानले राम्रो प्रदर्शन गर्न सकेनन् ।

भारतका तीव्र गतिका बलर भुवनेश्वर कुमारले ३.३ ओभरमा २२ रन खर्चेर ४ विकेट लिए । दीपक चाहरले ३ ओभरमा २४ रन खर्चिदै २ विकेट लिए । हार्दिक पान्ड्या, क्रुनाल पान्ड्या, बरुणचक्रबर्ती र युजभेन्द्र चहलको नाममा एक विकेट रह्यो ।

त्यअघि आर प्रेमाडासा स्टेडियम कोलोम्बोमा टस हारेर ब्याटिङको निम्तो पाएको भारतले निर्धारित २० ओभरमा ५ विकेट गुमाउँदै १ सय ६४ रन बनाएको थियो । अन्तिम पाँच ओभरमा श्रीलंकाले मात्र ४३ रन खर्चिदै उत्कृष्ट बलिङ गरेको थियो । भारतका सूर्यकुमार यादवले ३४ बलमा ५ चौका र २ छक्का सहित सर्वाधिक ५० रनको योगदान दिए ।

ओपनर पृथ्वी शा टि२० आई डेब्यूको पहिलो खेलमा पहिलो बलमै शून्यमा क्याच आउट हुन पुगे । पृथ्वी तीव्र गतिका बलर दुश्मन्था चामिरा बलमा एज लागेर आउट भएका थिए । दोस्रो विकेटका लागि कप्तान शिखर धवन र सन्जु स्यामसनले ३६ बलमा ५१ रनको साझेदारी गर्दै इनिङ अघि बढाएका थिए । स्यामसनलाई स्पिनर वानिन्दु हसरंगाले २७ रनमा एलबिडब्लू आउट गरे । स्यामसनले २० बलमा २ चौका र १ छक्का प्रहार गरेका थिए ।

तेस्रो विकेटका लागि शिखरले सूर्यसँग ४८ बलमा ६२ रनको साझेदारी गरेका थिए । शिखरलाई १५ औं ओभरको पहिलो बलमा चामिका करुणारत्नले एशेन बन्डाराबाट ४६ रनमा क्याच आउट गराउँदै साझेदारी तोडेका थिए । शिखरले ३६ बलमा ४ चौका र १ छक्का प्रहार गरे । एक ओभरपछि वानिन्दुको बलमा सूर्य क्याच आउट भएका थिए । भारतका फिनिसर हार्दिक पान्ड्या १२ बल खेलि १० रन बनाए । ईशान किशन १४ बलमा १ चौका र १ छक्का सहित २० रनमा अविजित रहे । क्रुनाल पान्ड्या ३ बलमा ३ रनमा अविजित रहे ।

श्रीलंका स्पिनर वानिन्दु हसरंगाले ४ ओभरमा २८ रन खर्चेर २ विकेट लिए । दुश्मन्था चामिराले ४ ओभरमा २४ रन खर्चेर २ विकेट लिए । चामिका करुणारत्नेको नाममा एक विकेट रह्यो । दोस्रो खेल मंगलबार हुने छ ।