एजेन्सी – भारतले श्रीलंकाविरुद्ध दोस्रो टि२० आई खेलमा ७ खेलाडी परिवर्तन गरेको छ । आर प्रेमाडासा स्टेडियम कोलोम्बोमा श्रीलंका कप्तान दासुन शनाकाले टस जितेर पहिला बलिङ गर्ने निर्णय लिएका छन् ।

भारतले दोस्रो टि२० आई खेलमा ७ खेलाडी परिवर्तन गरेको छ । क्रुनाल पान्ड्यालाई मंगलबार कोरोना देखिएपछि उनको सम्पर्कमा आएका थप ८ खेलाडी आइसोलेसनमा गएपछि भारतले एकै पटक ७ खेलाडी परिवर्तन गर्नु परेको हो । पहिलो खेलबाट हार्दिक पान्ड्या, क्रुनाल पान्ड्या, ईशान किशन, पृथ्वी शा, दीपक चाहर, युजभेन्द्र चहल र सूर्यकुमार यादव टोलीमा छैनन् ।

भारतले चार खेलाडीलाई टि२० आईमा डेब्यू दिएको छ । ओपनर देवदत्त पाडिक्कल, ऋतुराज गायकवाड, नितिश राणा र युवा तीव्र गतिका बलर चेतन सकारियाले टि२० आईमा डेब्यू गरेका छन् । त्यस्तै कुलदीप यादव, नवदीप सैनी र राहुल चाहर टोलीमा फर्किएका छन् ।पाडिक्कलले रोयल च्यालेन्जर्स बेंगलोरबाट आइपिएल खेल्ने गर्दछन् । बायाँ हाते ओपनर पाडिक्कलले गत सिजन डेब्यू गर्दै ४ सय ७३ रनका साथ इमर्जिङ प्लेयर चुनिएका थिए । यस सिजनमा पनि पाडिक्कलले उत्कृष्ट प्रदर्शन गर्नेक्रममा राजस्थान रोयल्सविरुद्ध १ सय १ रनको उत्कृष्ट शतकीय इनिङ खेलेका थिए ।

ऋतुराजले चेन्नई सुपर किंग्सबाट आइपिएल खेल्दै उत्कृष्ट प्रभाव छाडि सकेका छन् । नितिशले कोलकाता नाइट राइडर्स र सकारियाले यसै सिजन राजस्थान रोयल्सबाट आइपिएल खेलेका थिए । ऋतुराजले गतवर्ष अन्तिम तीन खेलमा लगातार अर्धशतक प्रहार गरेका थिए । यस सिजनमा १ सय ९६ रनका साथ राम्रो प्रदर्शन गरेका थिए ।

दोस्रो खेल मंगलबार हुने तयभएपनि क्रुनाल पान्ड्यालाई कोरोना देखिएपछि एकदिनपछि सरेको थियो । श्रीलंकाले टोलीमा दुई परिवर्तन गरेको छ । रमेश मेन्डिसले डेब्यू गरेका छन् । पहिलो खेलबाट चारिथ असालन्का र एशेन बन्डारा दोस्रो खेलमा छैनन् । सदिरा समाराविक्रम टोलीमा फर्किका छन् ।

भारतको प्लेइङ ११ : शिखर धवन(कप्तान), ऋतुराज गायकवाड, देवदत्त पाडिक्कल, सन्जु स्यामसन(विकेटकिपर), नितिश राणा, भुवनेश्वर कुमार, कुलदीप यादव, राहुल चाहर, नवदीप सैनी, चेतन सकारिया र बरुणचक्रवर्ती ।

श्रीलंका प्लेइङ ११ : अविष्का फ्रेनान्डो, मिनोद भानुका (विकेटकिपर), धनन्जय डि सिल्भा, सदिरा समाराविक्रम , दासुन शनाका (कप्तान), रमेश मेन्डिस, वानिन्दु हसरंगा, चामिका करुणारत्ने, ईसुरु उडाना, अकिला धनन्जय र दुश्मन्था चामिरा ।