एजेन्सी – भारतले दोस्रो टि२० आई खेलमा श्रीलंकालाई १ सय ३३ रनको सामान्य लक्ष्य दिएको छ । आर प्रेमाडासा स्टेडियम कोलोम्बोमा टस हारेर ब्याटिङ थालेको भारतले निर्धारित २० ओभरमा ५ विकेट गुमाउँदै १ सय ३२ रन बनायो ।

कोरोना कारण प्रमुख नौं खेलाडी आइसोलेसनमा हुँदा भारतले अन्तिम रोजाईको टोली मैदान उतारेको थियो । भारतका कप्तान शिखर धवनले सर्वाधिक ४० रनको योगदान दिए । भारतलाई ओपनर शिखर धवन र ऋतुराज गायकवाडले ७ ओभरमा ४९ रनको साझेदारी गर्दै मध्यम सुरुवात दिलाएका थिए ।

प्रमुख खेलाडी टोलीमा नहुँदा शिखर दबाबमा थिए । डेब्यू खेल खेलेका ऋतुराजलाई कप्तान दासुन शनाकाले विकेटकिपर मिनोद भानुकाबाट २१ रनमा क्याच गराउँदै पहिलो सफलता दिलाए । ऋतुराजले १८ बलमा १ चौका प्रहार गरे । शिखरलाई स्पिनर अकिला धनन्जयले १३ औं ओभरको पहिलो बलमा ४० रनमा बोल्ड आउट गरे । धवनले ४२ बलमा ५ चौका प्रहार गरे ।

१६ औं ओभरको तेस्रो बलमा अर्का डेब्यू खेल खेलेका देवदत्त पाडिक्कल २३ बलमा १ चौका र १ छक्का सहित २९ रनमा बोल्ड आउट भए । उनलाई स्पिनर वानिन्दु हसरंगाले बोल्ड आउट गरेका थिए । अकिलाले सन्जु स्यासनलाई ७ रनमा बोल्ड आउट गरे । उनले १३ बल खेल्दा कुनैपनि बाउन्ड्री प्रहार गर्न सकेनन् । भुवनेश्वर कुमार १३ र नितिश राणाले ९ रन बनाए ।

श्रीलंकाले खेलमा आठ बलर प्रयोग गरेको थियो । स्पिनर अकिला धनन्जयले ४ ओभरमा २९ रन खर्चेर २ विकेट लिए । कप्तान दासुन शनाका, दुश्मन्था चामिरा र स्पिनर वानिन्दु हसरंगाले एक एक विकेट लिए ।

क्रुनाल पान्ड्यालाई मंगलबार कोरोना देखिएपछि भारतका नौं खेलाडी आइसोलेसनमा छन् । हार्दिक पान्ड्या, ईशान किशन, पृथ्वी शा र सूर्यकुमार यादव जस्ता ब्याट्सम्यान नहुँदा भारतको ब्याटिङ निकै कमजोर बनेको छ । भारतले खेलमा पाँच ब्याट्सम्यान र ६ बलर मैदान उतारेको छ ।