एजेन्सी – श्रीलंकाले दोस्रो टि२० आई खेलमा भारतमाथि ४ विकेटको रोमान्चक जित हात पारेको छ । यो जितसँगै तीन टि२० आई सिरिजमा घरेलु टोली श्रीलंकाले १–१ को बराबरी गरेको छ । जितको लागि १ सय ३३ रनको विजयी लक्ष्य पछ्याएको श्रीलंकाले १९.४ ओभरमा ६ विकेट गुमाउँदै पूरा गर्यो ।

श्रीलंका धनन्जय डि सिल्भा ३४ बलमा १ चौका र १ छक्का सहित ४० रनमा अविजित रहँदै जित पक्का गराए । चामिका करुणारत्ने ६ बलमा १ छक्का सहित १२ रनमा अविजित रहे । श्रीलंकालाई अन्तिम ओभरमा जितको लागि ८ रनको चाहिँएको थियो ।

डेब्यू खेल खेलेका युवा तीव्र गतिका बलर चेतन सकारियाले पहिलो बलमा एक रन खर्चिदा त्यसपछि दुई वाइड फालेका थिए । धनन्जयले दोस्रो बलमा थप दुई रन बटुलेपछि श्रीलंका जित सहज बनेको थियो । तेस्रो बलमा पनि दुई रन बटुले । चौथो बलमा एक रन बटुल्दै धन्जयले जित पक्का गराए ।

श्रीलंका ओपनर मिनोद भानुकाले ३१ बलमा ४ चौका सहित ३६ रनको योगदान दिए । वानिन्दु हसरंगा १५ र अविष्का फ्रेनान्डो ११ रनमा आउट भए । सदिरा समराविक्रम ८, कप्तान दासुन शनाका ३, रमेश मेन्डिस २ रनमा आउट भए ।

भारतका कुलदीप यादवले ४ ओभरमा ३० रन खर्चेर २ विकेट लिए । चेतन सकारिया, भुवनेश्वर कुमार, बरुण चक्रवर्ती र राहुल चाहरले एक एक विकेट लिए ।

त्यसअघि आर प्रेमाडासा स्टेडियम कोलोम्बोमा टस हारेर ब्याटिङ थालेको भारतले निर्धारित २० ओभरमा ५ विकेट गुमाउँदै १ सय ३२ रन बनाएको थियो । कोरोना कारण प्रमुख नौं खेलाडी आइसोलेसनमा हुँदा भारतले अन्तिम रोजाईको टोली मैदान उतारेको थियो । भारतका कप्तान शिखर धवनले सर्वाधिक ४० रनको योगदान दिए । भारतलाई ओपनर शिखर धवन र ऋतुराज गायकवाडले ७ ओभरमा ४९ रनको साझेदारी गर्दै मध्यम सुरुवात दिलाएका थिए ।

प्रमुख खेलाडी टोलीमा नहुँदा शिखर दबाबमा थिए । डेब्यू खेल खेलेका ऋतुराजलाई कप्तान दासुन शनाकाले विकेटकिपर मिनोद भानुकाबाट २१ रनमा क्याच गराउँदै पहिलो सफलता दिलाए । ऋतुराजले १८ बलमा १ चौका प्रहार गरे । शिखरलाई स्पिनर अकिला धनन्जयले १३ औं ओभरको पहिलो बलमा ४० रनमा बोल्ड आउट गरे । धवनले ४२ बलमा ५ चौका प्रहार गरे ।

१६ औं ओभरको तेस्रो बलमा अर्का डेब्यू खेल खेलेका देवदत्त पाडिक्कल २३ बलमा १ चौका र १ छक्का सहित २९ रनमा बोल्ड आउट भए । उनलाई स्पिनर वानिन्दु हसरंगाले बोल्ड आउट गरेका थिए । अकिलाले सन्जु स्यासनलाई ७ रनमा बोल्ड आउट गरे । उनले १३ बल खेल्दा कुनैपनि बाउन्ड्री प्रहार गर्न सकेनन् । भुवनेश्वर कुमार १३ र नितिश राणाले ९ रन बनाए ।

श्रीलंकाले खेलमा आठ बलर प्रयोग गरेको थियो । स्पिनर अकिला धनन्जयले ४ ओभरमा २९ रन खर्चेर २ विकेट लिए । कप्तान दासुन शनाका, दुश्मन्था चामिरा र स्पिनर वानिन्दु हसरंगाले एक एक विकेट लिए । पहिलो खेलमा भारत ३८ रनले विजयी भएको थियो । तेस्रो खेल विहिबार हुने छ ।