एजेन्सी – पाकिस्तानका विकेटकिपर ब्याट्सम्यान मोहम्मद रिजवानले टि२० आई क्रिकेटमा नयाँ विश्व कीर्तिमान बनाएका छन् । शनिवार राती रिजवानले वेस्टइन्डिजविरुद्ध दोस्रो टि२० आई खेलमा ४६ रन बनाउनेक्रममा नयाँ विश्व कीर्तिमान कायम गरेका हुन् ।

रिजवान टि२० आई क्रिकेटमा एकै वर्षमा सर्वाधिक रन बनाउने खेलाडी बनेका छन् । लगातार उत्कृष्ट प्रदर्शन गर्दै आएका रिजवान ७ महिनामै टि२० आई इतिहासमा एकै वर्षमा सर्वाधिक रन बनाउने खेलाडी बनेका हुन् । रिजवानले १५ खेलको १४ इनिङमा ब्याटिङ गर्दै कुल ७ सय ५२ रन बनाई सकेका छन् । ६ पटक अविजित रहँदा १ शतक र ७ अर्धशतक सामेल छ । कुल ५ सय ३७ बल खेल्दा उनको स्ट्राइकरेट १ सय ४०, ६५ चौका र २५ छक्का प्रहार गरेका छन् ।

यसअघि टि२० आई इतिहासमा एकै वर्षमा सर्वाधिक रन बनाउने कीर्तिमान आयरल्यान्डका पल स्टर्लिङको नाममा थियो । स्टर्लिङले २०१९ मा २० खेलमा ७ सय ४८ रन बनाएका थिए । तेस्रो स्थानमा आयरल्यान्डकै केभिन ओ ब्रायनले २०१९ मा २३ खेल खेल्दै कुल ७ सय २९ रन जोडेका थिए ।

रिजवान र कप्तान बाबर आजमको उत्कृष्ट ब्याटिङमा पाकिस्तानले टि२० क्रिकेटमा उच्च प्रदर्शन गर्दै आएको छ । पाकिस्तानलाई मध्यक्रम र तल्लोक्रम ब्याटिङ भने चिन्ताको विषय बन्दै आएको छ । आगमी अक्टोबर नोभेम्बरमा हुने टि२० विश्वकपमा पाकिस्तानलाई पनि उपाधिको दाबेदार मानिएको छ । पाकिस्तानले दोस्रो टि२० खेलमा वेस्टइन्डिजलाई ७ रनले पराजित गरेको थियो । तेस्रो खेल आज राती हुँदै छ ।